கடும் மின்னல் தாக்கம் குறித்து 25 மாவட்டங்களுக்கு எச்சரிக்கை – 3 மாவட்டங்களுக்கு சிவப்பு எச்சரிக்கை!
இலங்கையின் மூன்று மாவட்டங்களுக்கு கடும் மின்னல் தாக்கம் தொடர்பான சிவப்பு எச்சரிக்கையும், மேலும் 22 மாவட்டங்களுக்கு அம்பர் நிற எச்சரிக்கையும் விடுக்கப்பட்டுள்ளதாக வளிமண்டலவியல் திணைக்களம் அறிவித்துள்ளது.
இன்று (29) காலை 11.30 மணிக்கு வெளியிடப்பட்ட இந்த அறிவித்தலின்படி, அம்பாறை, மட்டக்களப்பு மற்றும் ஹம்பாந்தோட்டை ஆகிய மாவட்டங்களுக்கு சிவப்பு எச்சரிக்கை விடுக்கப்பட்டுள்ளது.
ஊவா மாகாணம் உள்ளிட்ட ஏனைய 22 மாவட்டங்களுக்கும் இடியுடன் கூடிய மழையின்போது கடும் மின்னல் தாக்கம் ஏற்படக்கூடும் என எச்சரிக்கை விடுக்கப்பட்டுள்ளது.
இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பிரதேச ரீதியில் பலத்த காற்றும் வீசக்கூடும் என வளிமண்டலவியல் திணைக்களம் தெரிவித்துள்ளது.
### பொதுமக்களுக்கு அறிவுறுத்தல்
இடியுடன் கூடிய மின்னல் தாக்கம் ஏற்படும் சந்தர்ப்பங்களில் பாதுகாப்பான கட்டடங்களுக்குள் தங்கியிருக்குமாறு பொதுமக்கள் அறிவுறுத்தப்பட்டுள்ளனர்.
மேலும், மரங்களின் கீழ் நிற்பதைத் தவிர்ப்பதுடன், வயல்வெளிகள், தேயிலைத் தோட்டங்கள் மற்றும் திறந்த நீர்நிலைகள் போன்ற திறந்தவெளிப் பகுதிகளில் இருப்பதையும் தவிர்க்குமாறு அறிவுறுத்தப்பட்டுள்ளது.
கம்பி இணைப்புள்ள தொலைபேசிகள் மற்றும் மின்சாரத்துடன் இணைக்கப்பட்டுள்ள உபகரணங்களைப் பயன்படுத்துவதைத் தவிர்க்குமாறும், துவிச்சக்கர வண்டிகள், உழவு இயந்திரங்கள் மற்றும் படகுகள் உள்ளிட்ட திறந்த வாகனங்களில் பயணிப்பதைத் தவிர்க்குமாறும் பொதுமக்களிடம் கோரிக்கை விடுக்கப்பட்டுள்ளது.
அத்துடன், முறிந்து விழும் மரங்கள் மற்றும் அறுந்து விழும் மின்சாரக் கம்பிகள் தொடர்பில் அவதானமாக இருக்குமாறும், அவசர நிலைமைகளின்போது உள்ளூர் அனர்த்த முகாமைத்துவ அதிகாரிகளைத் தொடர்புகொள்ளுமாறும் அறிவுறுத்தப்பட்டுள்ளது.
இந்த எச்சரிக்கை இன்று (29) இரவு 11.30 மணி வரை அமுலில் இருக்கும் என வளிமண்டலவியல் திணைக்களம் மேலும் தெரிவித்துள்ளது.
