ஒழுங்கமைக்கப்பட்ட குற்றங்களைத் தடுக்கும் சட்டமூலத்தின் 72 மணி நேர தடுப்புக் காவலை 48 மணி நேரமாகக் குறைக்க அரசு தயார் – ஜனாதிபதி

ஒழுங்கமைக்கப்பட்ட குற்றங்களைத் தடுக்கும் சட்டமூலத்தில் முன்மொழியப்பட்டுள்ள 72 மணி நேர தடுப்புக் காவல் காலத்தை 48 மணி நேரமாகக் குறைப்பதற்கு அரசாங்கம் தயாராக இருப்பதாக ஜனாதிபதி அநுரகுமார திஸாநாயக்க தெரிவித்துள்ளார்.

குறித்த சட்டமூலத்தின் சில ஏற்பாடுகள் தொடர்பாக எழுந்துள்ள எதிர்ப்புகளைக் கருத்திற்கொண்டு, மூன்று முக்கிய விடயங்களில் திருத்தங்களை மேற்கொள்ள அரசாங்கம் தீர்மானித்துள்ளதாகவும் அவர் குறிப்பிட்டுள்ளார்.

போதைப்பொருள் ஒழிப்பு நடவடிக்கையான **'நாடு ஒன்றிணைந்த தேசிய செயற்றிட்டத்தின்' (Ratama Ekata)** முதலாம் ஆண்டு நிறைவை முன்னிட்டு இன்று (05) நடைபெற்ற நிகழ்வில் உரையாற்றியபோதே ஜனாதிபதி இதனைத் தெரிவித்துள்ளார்.

இதன்போது, சட்டமூலத்தில் திருத்தம் செய்யப்பட வேண்டிய மூன்று முக்கிய விடயங்களாக, சந்தேகநபர்களைத் தடுப்புக் காவலில் வைக்கும் காலப்பகுதி, குற்றக் கும்பல்களின் உறுப்பினர்களை அடையாளம் காணப் பயன்படுத்தப்படும் பச்சை குத்தல்கள் தொடர்பான ஏற்பாடுகள் மற்றும் கலால் கட்டளைச் சட்டத்தின் கீழான குற்றங்களை உள்ளடக்கியுள்ளமை ஆகியவற்றை ஜனாதிபதி சுட்டிக்காட்டியுள்ளார்.

இந்த மூன்று விடயங்கள் தொடர்பிலும் சட்டமூலத்திற்கு எதிராக மனுத் தாக்கல் செய்த தரப்பினர் எழுப்பியுள்ள ஆட்சேபனைகளை ஏற்றுக்கொண்டு, திருத்தங்களை மேற்கொள்ள அரசாங்கம் தயாராக இருப்பதாக உயர் நீதிமன்றத்திற்கு அறிவிக்கவுள்ளதாகவும் அவர் தெரிவித்துள்ளார்.

தற்போது உயர் நீதிமன்றத்தின் பரிசீலனையில் உள்ள குறித்த சட்டமூலத்தில், சந்தேகநபர்களை 72 மணி நேரம் வரை தடுப்புக் காவலில் வைக்க அனுமதிக்கும் ஏற்பாட்டுக்கு எதிர்ப்புகள் முன்வைக்கப்பட்டுள்ளன.

இதனைக் கருத்திற்கொண்டு, அந்தக் காலப்பகுதியை 48 மணி நேரமாகக் குறைக்க அரசாங்கம் இணங்கியுள்ளதாக ஜனாதிபதி குறிப்பிட்டுள்ளார்.

அத்துடன், ஒழுங்கமைக்கப்பட்ட குற்றக் கும்பல்களின் உறுப்பினர்களை அடையாளம் காண்பதற்குப் பச்சை குத்தல்களைப் பயன்படுத்துவது சர்வதேச ரீதியில் நடைமுறையில் இருந்தாலும், இலங்கைக்கு அது பொருத்தமற்றது எனக் கருதப்பட்டால் அந்த ஏற்பாட்டை நீக்கவும் அரசாங்கம் தயாராக இருப்பதாக அவர் தெரிவித்துள்ளார்.

மேலும், கலால் கட்டளைச் சட்டத்தின் கீழான குற்றங்களையும் இந்தச் சட்டமூலத்திலிருந்து நீக்குவதற்கு தீர்மானித்துள்ளதாக ஜனாதிபதி அறிவித்துள்ளார்.

இந்தச் சட்டமூலத்திற்கு எதிர்ப்புத் தெரிவித்துள்ள மனித உரிமைகள் அமைப்புகள் மற்றும் சிவில் சமூக அமைப்புகளுடன் கலந்துரையாடுவதற்கும் அரசாங்கம் தயாராக இருப்பதாக அவர் தெரிவித்துள்ளார்.

ஒழுங்கமைக்கப்பட்ட குற்றச் செயல்களின் அதிகரித்து வரும் அச்சுறுத்தலைக் கட்டுப்படுத்துவதற்காகவே இந்தச் சட்டமூலம் கொண்டுவரப்படுவதாகக் குறிப்பிட்ட ஜனாதிபதி, இதற்கு முன்னர் இத்தகைய குற்றங்களைக் கட்டுப்படுத்த பயங்கரவாதத் தடைச் சட்டத்தின் (PTA) ஏற்பாடுகள் பயன்படுத்தப்பட்டதாகவும் தெரிவித்துள்ளார்.

ஒழுங்கமைக்கப்பட்ட குற்ற வலையமைப்புகள் தற்போது அதிக வலிமை பெற்றுள்ள நிலையில், அவற்றைக் கட்டுப்படுத்துவதற்கெனத் தனியான சட்ட ஏற்பாடுகள் அவசியமாகியுள்ளதாகவும் அவர் சுட்டிக்காட்டியுள்ளார்.

மாறிவரும் சூழ்நிலைகளுக்கு ஏற்ப நடைமுறையிலுள்ள சட்டங்களும் மாற்றமடைய வேண்டும் எனவும், ஒழுங்கமைக்கப்பட்ட குற்றங்களை எதிர்கொள்வதற்குப் பொருத்தமான சட்டங்களை உருவாக்குவது நாடாளுமன்றத்தின் பொறுப்பு எனவும் ஜனாதிபதி தெரிவித்துள்ளார்.

அரசாங்கத்தின் நோக்கம் பொதுமக்களின் அடிப்படை உரிமைகளை மீறுவதோ அல்லது அரசாங்கம், பொலிஸார் மற்றும் ஏனைய சட்ட அமுலாக்க அதிகாரிகளுக்கு அளவுக்கு அதிகமான அதிகாரங்களை வழங்குவதோ அல்ல எனவும் அவர் வலியுறுத்தியுள்ளார்.

இலங்கையில் ஒழுங்கமைக்கப்பட்ட குற்றங்களைத் தடுப்பதற்கும் அவற்றுக்கு எதிரான நடவடிக்கைகளை வலுப்படுத்துவதற்கும் மட்டுமே இந்தச் சட்டமூலம் கொண்டுவரப்படுவதாக ஜனாதிபதி மீண்டும் தெரிவித்துள்ளார்.