உணவுப் பாதுகாப்பு முறைப்பாடுகளுக்கு QR குறியீட்டு முறை அறிமுகம் – கொழும்பு மாநகர சபை நடவடிக்கை

கொழும்பு மாநகர சபை (CMC), உணவகங்கள் மற்றும் உணவு விற்பனை நிலையங்கள் தொடர்பான சுகாதாரப் பிரச்சினைகள் குறித்து பொதுமக்கள் முறைப்பாடுகளைச் சமர்ப்பிப்பதற்காக QR குறியீட்டு அடிப்படையிலான புதிய முறைமையொன்றை அறிமுகப்படுத்தியுள்ளது.

கொழும்பு மாநகர முதல்வர் வ்ராய் கல்லி பால்தசார் (Vraie Cally Balthazaar) இதனை அறிவித்துள்ளார்.

கொழும்பு மாநகர சபையின் பொதுச் சுகாதாரத் திணைக்களத்தினால் ஆரம்பிக்கப்பட்டுள்ள இத்திட்டம், ஆரம்பகட்டமாக வெள்ளவத்தையில் முன்னெடுக்கப்பட்டுள்ளதுடன், மஜெஸ்டிக் சிட்டி உணவு விற்பனைப் பகுதியையும் உள்ளடக்கியுள்ளது.

இந்த முறைமையின் ஊடாக, பொதுமக்கள் உணவகங்களில் காணப்படும் சுகாதாரக் குறைபாடுகள் அல்லது உணவுப் பாதுகாப்பு தொடர்பான பிரச்சினைகள் குறித்து அங்குள்ள QR குறியீட்டை ஸ்கேன் செய்து, குறுகிய விண்ணப்பப் படிவமொன்றை நிரப்பி முறைப்பாடுகளைச் சமர்ப்பிக்க முடியும்.

இவ்வாறு கிடைக்கும் முறைப்பாடுகள், மேலதிக விசாரணை மற்றும் தேவையான நடவடிக்கைகளுக்காக சம்பந்தப்பட்ட சுகாதார வைத்திய அதிகாரிகள் (MOH) மற்றும் பொதுச் சுகாதாரப் பரிசோதகர்களுக்கு (PHI) நேரடியாக அனுப்பி வைக்கப்படும்.

மேலும், முறைப்பாடுகளைச் சமர்ப்பிப்பவர்கள் தங்களது அடையாளத்தை வெளிப்படுத்தாமல் இரகசியமாகவும் முறைப்பாடுகளைப் பதிவு செய்ய முடியும் என மாநகர முதல்வர் தெரிவித்துள்ளார்.

கொள்வனவு செய்த உணவில் ஏதேனும் குறைபாடு அல்லது சுகாதாரப் பிரச்சினை காணப்பட்டால், அதனை மீண்டும் உணவகத்திடம் ஒப்படைக்காமல், குறித்த உணவுப் பொருளையும் அதற்கான பற்றுச்சீட்டையும் பாதுகாப்பாக வைத்திருக்குமாறு அவர் பொதுமக்களுக்கு அறிவுறுத்தியுள்ளார்.

விசாரணைகளின்போது அவை ஆதாரங்களாகத் தேவைப்படலாம் என்றும் அவர் சுட்டிக்காட்டியுள்ளார்.

இதற்கு மேலதிகமாக, கொழும்பு மாநகர சபையின் பொதுச் சுகாதாரத் திணைக்களத்தை 011 267 6161 என்ற தொலைபேசி இலக்கம் அல்லது cmchealthcomplaints\@gmail.com என்ற மின்னஞ்சல் முகவரி ஊடாகவும் பொதுமக்கள் தொடர்புகொண்டு முறைப்பாடுகளைச் சமர்ப்பிக்க முடியும்.

இந்தத் திட்டத்தை கொழும்பு 1 முதல் 15 வரையான அனைத்துப் பகுதிகளுக்கும் விரிவுபடுத்த எதிர்பார்த்துள்ளதாகத் தெரிவித்த மாநகர முதல்வர், உணவகங்களின் சுகாதாரத் தரத்தை மேம்படுத்துவதுடன், உணவுப் பாதுகாப்பைப் பேணுவதில் பொதுமக்களின் பங்களிப்பையும் அதிகரிப்பதே இதன் நோக்கம் எனக் குறிப்பிட்டுள்ளார்.