இஸ்ரேல் பிரதமர் நெதன்யாகுவின் அபுதாபி விஜயத்தை உறுதி செய்தது ஐக்கிய அரபு அமீரகம்

இஸ்ரேலிய பிரதமர் பெஞ்சமின் நெதன்யாகு, ஐக்கிய அரபு அமீரக அதிபர் ஷேக் முகமது பின் சயீத் அல் நஹ்யானை வார இறுதியில் நேரில் சந்தித்துப் பேச்சுவார்த்தை நடத்தியுள்ளதை ஐக்கிய அரபு அமீரகம் உத்தியோகபூர்வமாக உறுதிப்படுத்தியுள்ளது.

இஸ்ரேலிய பிரதமரின் அபுதாபி நகரத்திற்கான இந்த இரகசிய விஜயம் தொடர்பில் திங்கட்கிழமை இரவு அதிகாரபூர்வ அறிவிப்பு வெளியிடப்பட்டது.

இஸ்ரேலில் பொதுத்தேர்தல் நடைபெற இன்னும் ஒரு மாதமே எஞ்சியுள்ள நிலையிலும், 2023 அக்டோபர் 7 ஆம் திகதி இடம்பெற்ற தாக்குதலுக்கு முன்னதாக ஹமாஸ் அமைப்பினரின் பாரிய தாக்குதல் திட்டம் குறித்து அமீரக அதிபர் நெதன்யாகுவை எச்சரித்திருந்தார் என்ற சர்ச்சைக்குரிய செய்திகள் வெளியாகியுள்ள சூழலிலும் இவ்விஜயம் அமைந்துள்ளமை குறிப்பிடத்தக்கது.

"இச்சந்திப்பின் போது, ஐக்கிய அரபு அமீரகத்திற்கும் இஸ்ரேலுக்கும் இடையிலான இருதரப்பு உறவுகள் குறித்தும், அவற்றை மேலும் வலுப்படுத்துவது மற்றும் மேம்படுத்துவது குறித்தும் இரு தலைவர்களும் கலந்துரையாடினர்" என அமீரகத்தின் உத்தியோகபூர்வ செய்தி நிறுவனமான 'வாம்' (WAM) செய்தி வெளியிட்டுள்ளது.

2023 அக்டோபர் 7 ஆம் திகதி பாலஸ்தீனப் போராளிகளால் நடத்தப்பட்ட தாக்குதலில் 1,195 பேரளவில் கொல்லப்பட்டதுடன், சுமார் 250 பேர் பிணைப்பயிகளாகப் பிடித்தெடுத்துச் செல்லப்பட்டனர். இதனையடுத்து காசா பகுதி மீது இஸ்ரேல் மேற்கொண்ட இனப்படுகொலைத் தாக்குதல்களில் இதுவரை குறைந்தது 73,669 பாலஸ்தீனர்கள் கொல்லப்பட்டுள்ளனர்.

முன்னதாக, அக்டோபர் தாக்குதலுக்கு சுமார் 10 நாட்களுக்கு முன்பு அமீரக அதிபர், நெதன்யாகுவுடன் தொலைபேசியில் தொடர்பு கொண்டு அன்றைய ஹமாஸ் தலைவர் யஹ்யா சின்வார் (Yahya Sinwar) "பாரிய அதிர்ச்சி அளிக்கும் தாக்குதலுக்கு" தயாராகி வருவதாக எச்சரித்ததாக இஸ்ரேலிய நாளிதழான 'ஹாரெட்ஸ்' (Haaretz) செய்தி வெளியிட்டிருந்தது. அத்துடன், இஸ்ரேலின் உள்நாட்டு உளவு அமைப்பான 'ஷின் பெட்' (Shin Bet) நிறுவனத்திற்கும் அமீரகம் இதுகுறித்து எச்சரிக்கை விடுத்திருந்ததாக அச்செய்தியில் குறிப்பிடப்பட்டிருந்தது.

எனினும், தாக்குதலுக்கு முன்னர் தமக்கு எவ்வித முன்னெச்சரிக்கை தகவலும் கிடைக்கவில்லை என நெதன்யாகுவின் அலுவலகம் மறுத்துள்ளதுடன், குறித்த செய்தி அப்பட்டமான பொய் என்றும் 'ஹாரெட்ஸ்' நாளிதழ் மீது வழக்கு தொடரப்போவதாகவும் நெதன்யாகு அறிவித்துள்ளார்.

அமெரிக்காவின் மத்தியஸ்தத்தில் 2020 ஆம் ஆண்டு கையெழுத்தான 'ஆபிரகாம் உடன்படிக்கை' மூலமாக பல அரபு நாடுகள் இஸ்ரேலுடனான உறவை இயல்புநிலைக்கு கொண்டு வந்ததைத் தொடர்ந்து, ஐக்கிய அரபு அமீரகம் மற்றும் இஸ்ரேலுக்கு இடையிலான உறவு பலமடைந்து வருகிறது.

இஸ்ரேலின் சனல் 12 (Channel 12) ஊடகம் நெதன்யாகுவின் அமீரக விஜயம் குறித்த செய்தியை முதலில் வெளியிட்டிருந்தது. இச்செய்தியானது பிரதமரின் பாதுகாப்பிற்கு அச்சுறுத்தலை ஏற்படுத்தியுள்ளதுடன், உளவுத்துறையின் செயற்பாட்டு முறைகளை வெளிப்படுத்தியுள்ளதாகக் கூறி இஸ்ரேலிய இராணுவத் தணிக்கையாளரிடம் 'ஷின் பெட்' உளவு அமைப்பு முறைப்பாடு அளித்துள்ளது.

எதிர்வரும் அக்டோபர் மாதம் நடைபெறவுள்ள இஸ்ரேலிய பாராளுமன்ற தேர்தலில், முன்னாள் இராணுவத் தளபதி காடி ஐசனோட்டை எதிர்கொள்ளும் நெதன்யாகு, கருத்துக்கணிப்புகளில் பின்தங்கியுள்ள நிலையிலேயே இந்த அரசியல் நகர்வுகள் இடம்பெற்று வருகின்றன.