இஸ்ரேல் செல்லும் விமானத்தில் இடம்பெற்ற கத்திக்குத்து நடவடிக்கை: இதுவரை வெளியான தகவல்கள்

துபாயில் இருந்து டெல் அவிவ் நோக்கிச் சென்ற ஃபிளைதுபாய் விமானத்தில் இரு விமானிகளுக்கு இடையே ஏற்பட்ட மோதல் சம்பவம் தொடர்பில் இஸ்ரேலிய அதிகாரிகள் தீவிர விசாரணைகளை மேற்கொண்டு வருகின்றனர். இது இஸ்ரேலியர்களை இலக்கு வைத்து நடத்தப்பட்ட தாக்குதலா அல்லது தற்கொலை முயற்சியா என்பது உள்ளிட்ட பல்வேறு கோணங்களில் விசாரணைகள் இடம்பெற்று வருகின்றன.

இச்சம்பவத்திற்கான துல்லியமான காரணம் இதுவரை உறுதியாகத் தெரியவரவில்லை. இது குறித்து கருத்து தெரிவித்துள்ள இஸ்ரேல் பிரதமர் பெஞ்சமின் நெதன்யாகு , விமானி ஒருவர் மற்றொரு விமானியைக் கத்தியால் குத்தியதுடன், "பயணிகளுடன் விமானத்தை கீழே மோதி விபத்துக்குள்ளாக்க முயன்றதாகத் தோன்றுகிறது" எனக் குறிப்பிட்டுள்ளார். பயணிகள் மற்றும் விமானப் பணிக்குழாமினர் உடனடியாகச் செயற்பட்டு, தாக்குதல் நடத்தியதாகக் கூறப்படும் விமானியைக் கட்டுப்படுத்தி பெரும் பேரழிவைத் தடுத்துள்ளனர். விமானம் தரையிறங்கியதும் குறித்த உதவி விமானி (co-pilot) கைது செய்யப்பட்டதாகத் தெரிவித்த நெதன்யாகு, அவர் ஓமான் நாட்டைச் சேர்ந்தவர் என்றும் அடையாளம் காட்டியுள்ளார்.

துபாயில் இருந்து டெல் அவிவ் நோக்கிப் பயணித்த ஃபிளைதுபாய் 'FZ1073' ரக விமானம், சவூதி-ஜோர்தான் எல்லைக்கு அருகில் பறந்துகொண்டிருந்தபோது அவசர சமிக்ஞைகளை அனுப்பி, தனது பயணப் பாதையை மாற்றித் திரும்பியது. இதனைத் தொடர்ந்து, வடமேற்கு சவூதி அரேபியாவில் உள்ள தபூக் விமான நிலையத்தில் உள்ளூர் நேரப்படி காலை 9:45 மணியளவில் அவ்விமானம் அவசரமாகத் தரையிறக்கப்பட்டது.

விமானப் பயணத்தைக் கண்காணிக்கும் தரவுகளின்படி, முதல் அவசர சமிக்ஞையை அனுப்புவதற்கு முன்னதாக, 30 வினாடிகளுக்குள் விமானம் திடீரென சுமார் 14,000 அடிகள் வேகமாகக் கீழ்நோக்கி இறங்கியுள்ளது. விமானம் கீழ்நோக்கிச் செல்லத் தொடங்கியதும், பயணியொருவரும் பணிக்குழாம் உறுப்பினரொருவரும் விமான ஓட்டி அறைக்கு சென்று பார்த்தபோது, உதவி விமானி விமான அமைப்புகளை முடக்க முயற்சிப்பதைக் கண்டுள்ளனர் என நெதன்யாகு தெரிவித்துள்ளார். காயமடைந்த இரு விமானிகளும் தபூக் மருத்துவமனையில் அனுமதிக்கப்பட்டுள்ளதாக அறிவிக்கப்பட்டுள்ள அதேவேளை, பயணிகள் அனைவரும் பாதுகாப்பாக இருப்பதாகத் தெரிவிக்கப்பட்டுள்ளது.

இச்சம்பவம் பயங்கரவாதத் தாக்குதல் முயற்சியாக இருக்கக்கூடும் என்பதே இஸ்ரேலின் தற்போதைய மதிப்பீடாக உள்ளது என ராய்ட்டர்ஸ் செய்திச் சேவைக்கு இஸ்ரேலிய அதிகாரி ஒருவர் தெரிவித்துள்ளார். அதேவேளை, இது ஒரு விமானக் கடத்தல் நடவடிக்கை எனக் கருதப்படவில்லை என பிரதமரின் அலுவலக பேச்சாளர் ஒருவர் குறிப்பிட்டுள்ளார். இருப்பினும், இச்சம்பவத்தை வெறும் "சம்பவம்" என வர்ணித்துள்ள ஃபிளைதுபாய் நிறுவனம், விமான ஓட்டி அறையில் என்ன நடந்தது என்பது குறித்த மேலதிக விவரங்களை வெளியிட மறுத்துவிட்டது.

இஸ்ரேலுடன் உத்தியோகபூர்வ இராஜதந்திர உறவுகளைக் கொண்டிராத சவூதி அரேபியாவில், இந்த அவசரத் தரையிறக்கம் காரணமாக இஸ்ரேலிய பயணிகள் தற்காலிகமாகச் தங்கியிருக்க வேண்டிய நிலை ஏற்பட்டது. பயணிகளை மீட்டு அழைத்து வர இராணுவ விமானங்களை அனுப்ப இஸ்ரேல் விடுத்த கோரிக்கையை சவூதி அரேபியா நிராகரித்துவிட்டதாக பாதுகாப்புத் துறை ஆதாரங்களை மேற்கோள்காட்டி ராய்ட்டர்ஸ் செய்தி வெளியிட்டுள்ளது. எனினும், பயணிகள் அனைவரும் தமது சொந்த விமானத்தின் மூலமே பயணத்தைத் தொடர்வார்கள் என ஃபிளைதுபாய் நிறுவனம் அறிவித்துள்ளது.

இதற்கிடையில், துபாயில் இருந்து டெல் அவிவ் நோக்கிப் பயணித்த ஃபிளைதுபாய் நிறுவனத்தின் இரண்டாவது விமானம், இஸ்ரேலைச் சென்றடைந்து பாதுகாப்பாகத் தரையிறங்கியுள்ளமை குறிப்பிடத்தக்கது.