இலங்கையின் வேலையின்மை விகிதம் 2026 இரண்டாம் காலாண்டில் 4 சதவீதமாக அதிகரிப்பு
இலங்கையின் வேலையின்மை விகிதம் 2026 ஆம் ஆண்டின் இரண்டாம் காலாண்டில் 4.0 சதவீதமாக அதிகரித்துள்ளதாக மத்திய வங்கி வெளியிட்டுள்ள புதிய பொருளாதாரக் காட்டி அறிக்கையில் தெரிவிக்கப்பட்டுள்ளது.
கடந்த 2025 ஆம் ஆண்டின் இதே காலப்பகுதியில் 3.8 சதவீதமாக நிலவிய வேலையின்மை விகிதத்துடன் ஒப்பிடுகையில், இவ்வாண்டு இவ்வாறானதொரு உயர்ச்சி பதிவு செய்யப்பட்டுள்ளது. இலங்கை மத்திய வங்கியினால் வெளியிடப்படும் வாராந்த பொருளாதாரக் காட்டி அறிக்கையிலேயே இந்தத் தகவல்கள் குறிப்பிடப்பட்டுள்ளன.
அதேவேளை, நாட்டின் தொழிற் படை பங்கேற்பு விகிதமும் இக்காலப்பகுதியில் அதிகரிப்பைக் காட்டியுள்ளது. கடந்த 2025 ஆம் ஆண்டின் இரண்டாம் காலாண்டில் 49.3 சதவீதமாக இருந்த தொழிற் படை பங்கேற்பு விகிதம், 2026 ஆம் ஆண்டின் இரண்டாம் காலாண்டில் 50.0 சதவீதமாக உயர்ந்துள்ளதாக மத்திய வங்கியின் தரவுகள் சுட்டிக்காட்டுகின்றன.
