இலங்கையர்களின் வாழ்க்கைத்துணை, பிள்ளைகள் மற்றும் பேரப்பிள்ளைகளுக்கு இலவச இரட்டைக் குடியுரிமை – 2027 வரவு செலவுத் திட்டத்தில் முன்மொழிவு
வெளிநாடுகளில் வாழும் இலங்கையர்களின் வாழ்க்கைத்துணை, பிள்ளைகள் மற்றும் மூன்றாம் தலைமுறை வழித்தோன்றல்களுக்கு கட்டணமின்றி இரட்டைக் குடியுரிமை வழங்கும் திட்டம் 2027ஆம் ஆண்டுக்கான வரவு செலவுத் திட்டத்தில் முன்மொழியப்பட்டுள்ளது.
வெளிநாடுகளில் வாழும் இலங்கையர்களுக்கும் அவர்களது சந்ததியினருக்கும் இலங்கையுடனான உறவை மேலும் வலுப்படுத்தும் நோக்கில் இந்தத் திட்டம் முன்மொழியப்பட்டுள்ளதாக ஜனாதிபதி அநுர குமார திசாநாயக்க தெரிவித்துள்ளார்.
இதற்கமைய, இரண்டாம் மற்றும் மூன்றாம் தலைமுறை இலங்கை வம்சாவளியினரை இலக்காகக் கொண்டு 'உலகளாவிய இலங்கை மரபுரிமைக் குடிமக்கள்' (Global Sri Lankan Heritage Citizen) என்ற புதிய வேலைத்திட்டத்தை அறிமுகப்படுத்த அரசாங்கம் திட்டமிட்டுள்ளது.
இந்தத் திட்டத்தின் கீழ், இரட்டைக் குடியுரிமைக்கு விண்ணப்பிக்கும் இலங்கையர்களின் வாழ்க்கைத்துணை மற்றும் பிள்ளைகளுக்கும், மூன்றாம் தலைமுறை வழித்தோன்றல்களுக்கும் உரிய கட்டணங்கள் இன்றி இரட்டைக் குடியுரிமை வழங்குவதற்கு முன்மொழியப்பட்டுள்ளது.
வெளிநாடுகளில் வாழும் இலங்கையர்களிடமும் அவர்களது சந்ததியினரிடமும் காணப்படும் அறிவு, திறன்கள் மற்றும் ஆற்றல்களை நாட்டின் எதிர்கால அபிவிருத்திக்குப் பயன்படுத்திக்கொள்வதே இந்தத் திட்டத்தின் பிரதான நோக்கம் என ஜனாதிபதி குறிப்பிட்டுள்ளார்.
அத்துடன், வெளிநாடுகளில் பிறந்து வளர்ந்த இலங்கை வம்சாவளியைச் சேர்ந்த இளைய தலைமுறையினருக்கும் அவர்களது பூர்வீகத் தாய்நாட்டுக்கும் இடையிலான தொடர்புகளை வலுப்படுத்துவதையும் இந்தத் திட்டம் நோக்கமாகக் கொண்டுள்ளது.
இத்திட்டத்திற்கான தகைமை நிபந்தனைகள் மற்றும் நடைமுறைப்படுத்தல் தொடர்பான மேலதிக விபரங்கள் பின்னர் அறிவிக்கப்படும் என எதிர்பார்க்கப்படுகிறது.
