அரபிக்கடலில் 3,000 கோடி ரூபாய் பெறுமதியான போதைப்பொருட்கள் கைப்பற்றல்: 5 பாகிஸ்தானியர்கள் கைது!
அரபிக்கடல் பகுதியில் மேற்கொள்ளப்பட்ட விசேட கூட்டு நடவடிக்கையின் போது, சுமார் 3,000 கோடி ரூபாய்க்கும் அதிக பெறுமதியுடைய 526 கிலோகிராம் மெத்தம்பெட்டமைன் மற்றும் ஹெரோயின் ஆகிய போதைப்பொருட்களை அதிகாரிகள் கைப்பற்றியுள்ளனர்.
இந்திய கடலோரக் காவல்படையும் குஜராத் பயங்கரவாத எதிர்ப்புப் பிரிவும் இணைந்து முன்னெடுத்த நடவடிக்கையின் போதே ஈரானியப் படகொன்றில் இருந்து போதைப்பொருட்கள் பறிமுதல் செய்யப்பட்டுள்ளன. அத்துடன், குறித்த படகில் பயணித்த பாகிஸ்தான் நாட்டைச் சேர்ந்த ஐந்து சந்தேகநபர்களும் கைது செய்யப்பட்டுள்ளனர்.
கிடைக்கப்பெற்ற இரகசிய உளவுத் தகவலின் அடிப்படையில், கடற்படை மற்றும் வான்வழி கண்காணிப்பு தீவிரப்படுத்தப்பட்டது. இதன்போது, லட்சத்தீவுப் பகுதிக்கு மேற்கே அரபிக்கடலில் சந்தேகத்திற்கிடமாகப் பயணித்த குறித்த படகைப் பின்தொடர்ந்து சென்று அதிகாரிகள் முற்றுகையிட்டனர்.
கைப்பற்றப்பட்ட சொகுசுப் படகு, உயர்தர மெத்தம்பெட்டமைன், ஹெரோயின் போதைப்பொருட்கள் மற்றும் கைது செய்யப்பட்ட பாகிஸ்தானியர்கள் அனைவரும் மேலதிக விசாரணை மற்றும் சட்ட நடவடிக்கைகளுக்காக மும்பைக்குக் கொண்டு செல்லப்பட்டுள்ளனர்.
கடல் வழியாக இடம்பெறும் சர்வதேச போதைப்பொருள் கடத்தல்களைத் தடுப்பதற்குப் பாதுகாப்புத் தரப்பினர் தொடர்ச்சியான தீவிர நடவடிக்கைகளை முன்னெடுத்து வரும் நிலையில், இப் பாரிய கைப்பற்றல் இடம்பெற்றுள்ளமை குறிப்பிடத்தக்கது.
