அரச பொறியியலாளர்களின் சம்பளப் பிரச்சினைகள் குறித்து அரசு கவனம் – அமைச்சர் லால் காந்த

அரச சேவையில் பணியாற்றும் பொறியியலாளர்கள் எதிர்கொள்ளும் குறைந்த சம்பளம் மற்றும் போதிய வசதிகள் இன்மை உள்ளிட்ட பிரச்சினைகள் குறித்து அரசாங்கம் தீவிர கவனம் செலுத்தி வருவதாக விவசாயம், கால்நடை வளங்கள், காணி மற்றும் நீர்ப்பாசன அமைச்சர் கே.டி. லால் காந்த தெரிவித்துள்ளார்.

கொழும்பில் நேற்று (20) நடைபெற்ற அரச சேவை பொறியியலாளர் சங்கத்தின் வருடாந்த பொதுக் கூட்டத்தில் உரையாற்றியபோதே அமைச்சர் இதனைத் தெரிவித்தார்.

நாட்டின் அபிவிருத்தியில் பொறியியலாளர்கள் ஆற்றிவரும் பங்களிப்பை அரசாங்கம் அங்கீகரிப்பதாகக் குறிப்பிட்ட அமைச்சர், அவர்களின் உரிமைகளைப் பாதுகாப்பதற்கும் பணிச் சூழலை மேம்படுத்துவதற்கும் அரசாங்கம் அர்ப்பணிப்புடன் செயற்படுவதாகவும் தெரிவித்தார்.

அரச பொறியியலாளர்கள் எதிர்கொள்ளும் சவால்கள் குறித்து பொதுவெளியில் அதிகம் பேசப்படுவதில்லை என்றாலும், நாட்டின் அபிவிருத்தித் திட்டங்களை முன்னெடுப்பதில் பொறியியலாளர் சமூகத்தினர் முக்கிய பங்காற்றி வருவதாக அவர் சுட்டிக்காட்டினார்.

குறிப்பாக, போதிய சம்பளம் மற்றும் வசதிகள் இன்மை உள்ளிட்ட தொழில்சார் பிரச்சினைகள் தொடர்பில் அரசாங்கம் கவனம் செலுத்தியுள்ளதாகவும் அமைச்சர் குறிப்பிட்டார்.

தற்போதைய அரசாங்கம் முன்னெடுத்து வரும் அபிவிருத்தித் திட்டங்கள் குறித்துப் பேசிய அவர், புதிய அரசாங்கம் ஆட்சிப் பொறுப்பை ஏற்றுக்கொள்வதற்கு முன்னர் இடைநிறுத்தப்பட்டிருந்த பல திட்டங்கள் மீண்டும் ஆரம்பிக்கப்பட்டுள்ளதாகத் தெரிவித்தார்.

மேலும், நடைமுறையில் உள்ள கட்டமைப்புகள் மற்றும் செயன்முறைகளில் சீர்திருத்தங்களை மேற்கொள்ளும்போது பல்வேறு சவால்களையும் எதிர்ப்புகளையும் எதிர்கொள்ள வேண்டிய நிலை ஏற்படலாம் என்றும் அமைச்சர் சுட்டிக்காட்டினார்.

அதேவேளை, நாட்டின் அபிவிருத்திப் பணிகளைச் சிறப்பாக முன்னெடுப்பதற்காக அரச திணைக்களங்களுக்கு ஒதுக்கப்படும் நிதியை உரிய முறையில் பயன்படுத்துவதை உறுதிப்படுத்துவது மிகவும் அவசியமானது என்றும் அமைச்சர் கே.டி. லால் காந்த வலியுறுத்தினார்.