யானைகள் பாதுகாப்பில் இளம் தலைமுறையினரையும் வனவிலங்கு நிபுணர்களையும் இணைக்க வேண்டும் – சஜித் வலியுறுத்தல்

இலங்கையின் யானைகள் மற்றும் தந்தங்களைக் கொண்ட யானைகளைப் பாதுகாப்பதற்கான அரசாங்கத்தின் வேலைத்திட்டத்தில் இளம் தலைமுறையினர் (Gen Z), வனவிலங்கு புகைப்படக் கலைஞர்கள், சுற்றுச்சூழல் ஆர்வலர்கள் மற்றும் வனவிலங்கு பாதுகாப்பு அமைப்புகளையும் இணைத்துக்கொள்ள வேண்டும் என எதிர்க்கட்சித் தலைவர் சஜித் பிரேமதாச வலியுறுத்தியுள்ளார்.

காலநிலை மாற்றம் தொடர்பான நாடாளுமன்ற மன்றத்தில் உரையாற்றிய அவர், நாட்டின் வனவிலங்குகள் மற்றும் சுற்றுச்சூழல் கட்டமைப்புகளைப் பாதுகாப்பதற்கு இளம் தலைமுறையினர் உள்ளிட்ட அனைத்துத் தரப்பினரின் கூட்டு ஒத்துழைப்பும் அவசியம் எனக் குறிப்பிட்டார்.

பாதுகாப்புப் படையினர், சுற்றுச்சூழல் அமைச்சு மற்றும் 'Wild Tusker' குழுவினர் இணைந்து முன்னெடுத்து வரும் யானைகள் பாதுகாப்பு நடவடிக்கைகளை வரவேற்ற அவர், இது ஒரு சாதகமான முன்னேற்றம் என்றும் தெரிவித்தார்.

எனினும், தனித்துவமான யானைகள் மற்றும் தந்தங்களைக் கொண்ட யானைகளை அடையாளம் கண்டு, அவற்றுக்குப் பெயரிட்டு, தொடர்ச்சியாகக் கண்காணித்து வரும் பல வனவிலங்கு புகைப்படக் கலைஞர்கள் மற்றும் சுற்றுச்சூழல் ஆர்வலர்களும் யானைகள் பாதுகாப்பில் குறிப்பிடத்தக்க பங்களிப்பை வழங்கி வருவதாக அவர் சுட்டிக்காட்டினார்.

எனவே, யானைகள் பாதுகாப்பில் அர்ப்பணிப்புடன் செயற்பட்டு வரும் இத்தகைய நபர்களையும் அரசாங்கத்தின் பாதுகாப்பு வேலைத்திட்டத்தில் உள்வாங்க வேண்டும் என அவர் கேட்டுக்கொண்டார்.

அத்துடன், 17 தந்தங்களைக் கொண்ட யானைகளைப் பாதுகாப்பதற்கான அரசாங்கத்தின் நடவடிக்கை குறித்தும் கேள்வி எழுப்பிய சஜித் பிரேமதாச, பாதுகாப்பு தேவைப்படும் மேலும் பல யானைகள் இந்த வேலைத்திட்டத்தில் உள்ளடக்கப்படவில்லை எனக் குற்றஞ்சாட்டினார்.

பாதுகாப்பு தேவைப்படும் அனைத்து யானைகளுக்கும் உரிய பாதுகாப்பை உறுதிப்படுத்தும் வகையில், யானைகள் பாதுகாப்பில் ஈடுபட்டுள்ள அனைத்துத் தரப்பினரையும் ஒன்றிணைக்க வேண்டும் என்றும் அவர் வலியுறுத்தினார்.

இதேவேளை, வனவிலங்கு மருத்துவர்களுக்கான பற்றாக்குறை குறித்தும் அவர் கவலை வெளியிட்டார். நாட்டில் 33 வனவிலங்கு மருத்துவர்கள் தேவைப்படும் நிலையில், தற்போது 17 பேர் மாத்திரமே சேவையில் ஈடுபட்டுள்ளதாகக் குறிப்பிட்ட அவர், நிலவும் வெற்றிடங்களை நிரப்ப அரசாங்கம் நடவடிக்கை எடுக்க வேண்டும் எனக் கேட்டுக்கொண்டார்.

மேலும், யானைகள் கணக்கெடுப்புகளை நடத்தும்போது மிகுந்த அவதானத்துடன் செயற்பட வேண்டும் என்றும் அவர் வலியுறுத்தினார்.

கடந்த காலங்களில் யானைகள் கணக்கெடுப்புகளைத் தொடர்ந்து, செல்வாக்கு மிக்க சிலர் யானைகளைப் பிடித்து வளர்ப்பதற்கான சம்பவங்கள் இடம்பெற்றுள்ளதாகக் குற்றஞ்சாட்டிய அவர், மின்னேரியா தேசிய பூங்காவில் இருந்து யானைக் குட்டிகள் சட்டவிரோதமாகக் கொண்டுசெல்லப்பட்ட சம்பவங்களும் இடம்பெற்றுள்ளதாகத் தெரிவித்தார்.

எனவே, எதிர்காலத்தில் முன்னெடுக்கப்படும் யானைகள் கணக்கெடுப்புகளின்போது இவ்வாறான சம்பவங்களைத் தடுப்பதற்குப் போதிய பாதுகாப்பு ஏற்பாடுகள் செய்யப்பட வேண்டும் என்றும் அவர் வலியுறுத்தினார்.

இதற்கிடையில், பரந்த சுற்றுச்சூழல் விவகாரங்கள் குறித்துப் பேசிய அவர், அனர்த்தங்களைத் தடுப்பது, சுற்றுச்சூழல் கொள்கைகளை வலுப்படுத்துவது மற்றும் அவற்றின் நடைமுறைப்படுத்தலை மதிப்பீடு செய்வது ஆகியவற்றுக்கு காலநிலை மாற்றம் தொடர்பான நாடாளுமன்ற மன்றம் முக்கியத்துவம் அளிக்கும் எனத் தெரிவித்தார்.

இலங்கையின் வனவிலங்குகள், காடுகள், நிலம் மற்றும் நீர்சார் சுற்றுச்சூழல் கட்டமைப்புகள், கடல் சூழல் ஆகியவற்றைப் பாதுகாப்பதில் விஞ்ஞான நிபுணர்களின் பங்களிப்பும் அவசியம் என்றும் அவர் சுட்டிக்காட்டினார்.

சஜித் பிரேமதாச மற்றும் பேராசிரியர் எல். எம். அபேவிக்ரம ஆகியோர் இணைத் தலைமை வகிக்கும் குறித்த நாடாளுமன்ற மன்றத்தில், காலநிலை மாற்றத்தினால் ஏற்படும் சுற்றுச்சூழல் மற்றும் சமூகப் பாதிப்புகள் தொடர்பிலும், தேசிய கொள்கைத் தீர்மானங்களில் விஞ்ஞான நிபுணத்துவத்தை உள்வாங்குவதன் முக்கியத்துவம் குறித்தும் கலந்துரையாடப்பட்டது.