முன்னாள் முதல் பெண்மணி ஷிராந்தி ராஜபக்ச தேசிய மருத்துவமனையின் இருதயவியல் பிரிவில் அனுமதி
சிறைச்சாலை அதிகாரிகளின் காவலில் வெலிக்கடை சிறைச்சாலையில் தடுத்து வைக்கப்பட்டுள்ள முன்னாள் முதல் பெண்மணி ஷிராந்தி ராஜபக்ச, கொழும்பு தேசிய மருத்துவமனையின் இருதயவியல் பிரிவில் சிகிச்சைக்காக அனுமதிக்கப்பட்டுள்ளார்.
முன்னதாக இன்று, கைது செய்வதைத் தடுத்து நிறுத்த உத்தரவிடக் கோரி ஷிராந்தி ராஜபக்சவினால் தாக்கல் செய்யப்பட்ட முன்கூட்டியப் பிணை மனுவை மாளிகாகந்த நீதவான் நீதிமன்றம் நிராகரித்திருந்தது.
முன்னாள் ஜனாதிபதி மஹிந்த ராஜபக்சவின் மனைவியான ஷிராந்தி ராஜபக்ச, கடந்த ஒக்டோபர் 07 ஆம் திகதியன்று இலஞ்ச ஊழல் விசாரணை ஆணைக்குழுவினால் (CIABOC) கைது செய்யப்பட்டிருந்தார்.
அதனைத் தொடர்ந்து, அவர் கொழும்பு பிரதான நீதவான் நீதிமன்றத்தில் ஆஜர்படுத்தப்பட்டதை அடுத்து, ஒக்டோபர் 13 ஆம் திகதி வரை சிறைக் காவலில் வைக்க உத்தரவிடப்பட்டது.
சிறிலிய சவிய அமைப்பு ஊடாக, ரிஜ்வே பால தேசிய சிறுவர் மருத்துவமனைக்கு சி.டி ஸ்கேன் (CT scanner) இயந்திரம் வாங்குவதாகக் கூறி, தேசிய சேமிப்பு வங்கியில் (NSB) இருந்து 10 மில்லியன் ரூபா பெறப்பட்டதாகக் கூறப்படும் குற்றச்சாட்டுகளுக்கே இவர்களது கைது தொடர்புள்ளமை குறிப்பிடத்தக்கது.
