மாணிக்கக் கல் வியாபாரிகளிடம் லஞ்சம்? முன்னாள் இராஜாங்க அமைச்சர் சாமர சம்பத் கைது செய்யப்பட்டதன் பின்னணி

மாணிக்கக் கல் வியாபாரிகளிடம் லஞ்சம் கோரியமை மற்றும் பெற்றுக் கொண்டமை உள்ளிட்ட பல ஊழல் குற்றச்சாட்டுகளின் அடிப்படையில், முன்னாள் இராஜாங்க அமைச்சர் சாமர சம்பத் தசநாயக்க திங்கட்கிழமை (அக்டோபர் 12) கைது செய்யப்பட்டதைத் தொடர்ந்து, அவர் மீதான குற்றச்சாட்டுகள் குறித்த விவரங்களை இலஞ்சம் அல்லது ஊழல் பற்றிய சாட்டல்களை புலனாய்வு செய்வதற்கான ஆணைக்குழு (CIABOC) வெளியிட்டுள்ளது.

ஆணைக்குழு வெளியிட்டுள்ள அறிக்கையின்படி, முன்னாள் இராஜாங்க அமைச்சர் மாணிக்கக் கல் வியாபாரிகளிடம் இலஞ்சம் கோரிப் பெற்றுக் கொண்டதாகவும், பாஸ்பேட் ஏற்றுமதியில் ஈடுபட்ட நிறுவனங்களிடமிருந்து பல மில்லியன் ரூபாய்களைப் பெற்றுக் கொண்டதாகவும் குற்றம் சாட்டப்பட்டுள்ளது.

மாணிக்கக் கல் வியாபாரிகளிடம் பெறப்பட்ட இலஞ்சம்:

ஒரு மாணிக்கக் கல் வியாபாரியிடம் 1.2 மில்லியன் ரூபாயை இலஞ்சமாகக் கோரி, அதில் 5 இலட்சம் ரூபாயைப் பெற்றுக் கொண்டதாக ஆணைக்குழு தெரிவித்துள்ளது. மேலும், வேறு இரு மாணிக்கக் கல் வியாபாரிகளிடம் முறையே 1 மில்லியன் ரூபாய் மற்றும் 2 இலட்சம் ரூபாயைக் கோரிப் பெற்றுக் கொண்டதாகவும் அவர் மீது குற்றம் சுமத்தப்பட்டுள்ளது.

பாஸ்பேட் ஏற்றுமதி முறைகேடு:

மற்றொரு குற்றச்சாட்டாக, இலங்கை பாஸ்பேட் நிறுவனத்தின் ஊடாக முறையான நடைமுறைகளைப் பின்பற்றாமல் மூன்று நிறுவனங்கள் பாஸ்பேட் ஏற்றுமதிக்காகத் தேர்ந்தெடுக்கப்பட்டதாக ஆணைக்குழு குறிப்பிட்டது.

முன்னாள் இராஜாங்க அமைச்சர் தசநாயக்க, இந்நிறுவனங்களுக்கு ஏற்றுமதி ஏற்பாடுகளைச் செய்து கொடுத்து, தேவையான அனுமதிகளைப் பெற உதவியதாகக் கூறப்படுகிறது. இதற்குப் கைமாறாக, அந்த நிறுவனங்கள் முறையே 5.9 மில்லியன் ரூபாய், 2.2 மில்லியன் ரூபாய் மற்றும் 3 இலட்சம் ரூபாய் என மொத்தம் 8.4 மில்லியன் ரூபாயை வழங்கியதாகத் தெரிவிக்கப்படுகிறது.

அரசியல் பிரசாரங்களுக்குப் பயன்படுத்தப்பட்ட பணம்:

குறித்த பணத் தொகை முன்னாள் இராஜாங்க அமைச்சரின் தனிப்பட்ட செயலாளரின் வங்கிச் கணக்கில் வைப்பு செய்யப்பட்டு, தசநாயக்கவின் அரசியல் பிரசார நடவடிக்கைகளுக்காகப் பயன்படுத்தப்பட்டதாக ஆணைக்குழு தெரிவித்துள்ளது.

நீதிமன்ற நடவடிக்கை:

முன்னாள் இராஜாங்க அமைச்சர் திங்கட்கிழமை பிற்பகல் 1:16 மணியளவில் கைது செய்யப்பட்டார். அதனையடுத்து, கொழும்பு பிரதம நீதவான் நீதிமன்றத்தில் ஆஜர்படுத்தப்பட்ட அவரை எதிர்வரும் அக்டோபர் 23 ஆம் திகதி வரை விளக்கமறியலில் வைக்குமாறு நீதவான் உத்தரவிட்டார்.

இதேவேளை, பாஸ்பேட் ஏற்றுமதி தொடர்பான விசாரணைகள் தொடர்பாக அவருடைய முன்னாள் தனிப்பட்ட செயலாளரான சுமதிபால லியனாரச்சி என்பவரும் ஏற்கனவே கைது செய்யப்பட்டு விளக்கமறியலில் வைக்கப்பட்டுள்ளமை குறிப்பிடத்தக்கது.