நாடு முழுவதும் சுற்றிவளைப்பு: SLS முத்திரையற்ற 758-க்கும் அதிகமான தலைக்கவசங்கள் பறிமுதல்!

நுகர்வோர் விவகார அதிகார சபை (CAA) நாடு முழுவதும் மேற்கொண்ட அதிரடிச் சுற்றிவளைப்பு நடவடிக்கைகளின் மூலம், முறையான SLS தரச்சான்றிதழ் முத்திரைக் கட்டாயம் இல்லாத 758-க்கும் அதிகமான மோட்டார் சைக்கிள் தலைக்கவசங்கள் பறிமுதல் செய்யப்பட்டுள்ளதாக அறிவித்துள்ளது.

இதுகுறித்து நுகர்வோர் விவகார அதிகார சபை வெளியிட்டுள்ள செய்திக்குறிப்பின் விவரம் வருமாறு:

கடந்த ஒக்டோபர் மாதம் 06 ஆம் திகதியன்று ஆரம்பிக்கப்பட்ட இந்த விசேட தேடுதல் நடவடிக்கையின் கீழ், 21 மாவட்டங்களை உள்ளடக்கிய வகையில் 84 வெற்றிகரமான சுற்றிவளைப்புகள் முன்னெடுக்கப்பட்டன. SLS 517 தர நிர்ணய விதிகளுக்குப் புறம்பாக, எந்தவிதமான SLS தரச்சான்றிதழ் முத்திரையும் இன்றி விற்பனைக்கு வைக்கப்பட்டிருந்த குறைந்தது 327 மோட்டார் சைக்கிள் தலைக்கவசங்கள் இச்சுற்றிவளைப்புகளின்போது கைப்பற்றப்பட்டுள்ளன.

குறித்த சுற்றிவளைப்புகளின் போது, பல்வேறு வர்த்தக நாமங்களின் (Brand names) கீழ் சந்தைப்படுத்தப்பட்ட தலைக்கவசங்கள் கண்டுபிடிக்கப்பட்டதுடன், பல மாவட்டங்களில் ஒரே மாதிரியான அல்லது ஒத்த பிராண்டுகள் விற்பனை செய்யப்படுவது கண்டறியப்பட்டுள்ளது.

இதன் காரணமாக, சில்லறை விற்பனை நிலையங்களை மாத்திரம் குறிக்கோளாகக் கொள்ளாமல், இத்தகைய தரமற்ற தயாரிப்புகளைச் சந்தைக்கு அறிமுகப்படுத்திய சப்ளையர்கள், விநியோகஸ்தர்கள் , இறக்குமதியாளர்கள் மற்றும் உற்பத்தியாளர்கள் ஆகியோரைக் கண்டறியும் வகையில் விசாரணைகள் மேலும் விரிவுபடுத்தப்பட்டுள்ளதாக அதிகார சபை தெரிவித்துள்ளது.

இதேவேளை, கம்பஹா, முல்லைத்தீவு மற்றும் மன்னார் ஆகிய மாவட்டங்களில் போலி SLS ஸ்டிக்கர்கள் பயன்படுத்தப்பட்டமை குறித்த நம்பகமான தகவல்கள் கிடைக்கப்பெற்றுள்ளதை அடுத்து, அதுகுறித்த தீவிர விசாரணைகளும் ஆரம்பிக்கப்பட்டுள்ளன.

குழந்தைகளுக்கான தலைக்கவசங்கள் மற்றும் சிறிய அளவிலான தலைக்கவசங்கள் ஆகியவையும் உரிய SLS தரச்சான்றிதழ் இன்றி விற்பனை செய்யப்படுவது இதன்போது அடையாளம் காணப்பட்டுள்ளது. மோட்டார் சைக்கிள் ஓட்டுநர்கள் அல்லது ஏனைய வாகனப் பயனர்களுக்கான பாதுகாப்புத் தலைக்கவசங்களாக சந்தைப்படுத்தப்படும் இத்தகைய தயாரிப்புகள் அனைத்தும், பொருந்தக்கூடிய SLS 517 தரநிலைகளின் அடிப்படையில் பரிசோதிக்கு உட்படுத்தப்படும் என அதிகார சபை எச்சரித்துள்ளது.

மேலும், உற்பத்தியாளர்கள் மற்றும் விநியோகஸ்தர்களைக் கண்டறிவதற்கான போதிய விவரங்களோ அல்லது முறையான கொள்முதல் ரசீதுகளோ இன்றி தலைக்கவசங்கள் விற்பனை செய்யப்பட்டுள்ளமை விசாரணைகளில் வெளிச்சத்திற்கு வந்துள்ளது. இத்தகைய சட்டவிரோதச் செயல்களில் ஈடுபடுபவர்கள் மீது கடுமையான சட்ட நடவடிக்கை எடுக்கப்படவுள்ளது.

முன்னதாக, கடந்த ஜூலை மாதம் 27 ஆம் திகதியன்று நாடளாவிய ரீதியில் மேற்கொள்ளப்பட்ட மற்றொரு விசேட நடவடிக்கையின் போது 98 வெற்றிகரமான சுற்றிவளைப்புகள் முன்னெடுக்கப்பட்டு, SLS தரச்சான்றிதழ் அற்ற 431-க்கும் அதிகமான தலைக்கவசங்கள் கைப்பற்றப்பட்டிருந்தன.

இதற்கமைய, 2026 ஆம் ஆண்டு ஜூலை மற்றும் ஒக்டோபர் மாதங்களில் மேற்கொள்ளப்பட்ட இந்த இரண்டு விசேட அமலாக்க நடவடிக்கைகளின் ஊடாக மொத்தம் 182 வெற்றிகரமான சுற்றிவளைப்புகள் மேற்கொள்ளப்பட்டுள்ளதுடன், 758-க்கும் மேற்பட்ட மோட்டார் சைக்கிள் தலைக்கவசங்கள் பறிமுதல் செய்யப்பட்டுள்ளமை குறிப்பிடத்தக்கது. இந்த எண்ணிக்கை வர்த்தக நிலையங்களிலிருந்து நேரடியாகக் கைப்பற்றப்பட்ட தலைக்கவசங்களை மட்டுமே குறிக்கிறது என அதிகார சபை தெளிவுபடுத்தியுள்ளது.

உரிய SLS தரச்சான்றிதழ் முத்திரை இல்லாத மோட்டார் சைக்கிள் தலைக்கவசங்களை உற்பத்தி செய்தல், சேமித்து வைத்தல், காட்சிப்படுத்தல் அல்லது விற்பனை செய்தல் போன்ற நடவடிக்கைகளில் ஈடுபடுவதைத் தவிர்க்குமாறு உற்பத்தியாளர்கள், இறக்குமதியாளர்கள், விநியோகஸ்தர்கள், சில்லறை வர்த்தகர்கள் மற்றும் ஆன்லைன் விற்பனையாளர்களுக்கு நுகர்வோர் விவகார அதிகார சபை கடுமையான எச்சரிக்கை விடுத்துள்ளது.

நாடளாவிய ரீதியிலான திடீர்ச் சுற்றிவளைப்புப் பரிசோதனைகள் தொடர்ந்தும் இடம்பெறும் எனவும், விதிமீறல்களில் ஈடுபடுவோருக்கு எதிராகச் சட்டத்தின் முன் கடுமையான நடவடிக்கை எடுக்கப்படும் எனவும் அதிகார சபை திட்டவட்டமாகத் தெரிவித்துள்ளது.

பொதுமக்கள் மோட்டார் சைக்கிள் தலைக்கவசங்களை வாங்கும் போது, அவற்றுள் உள்ள SLS தரச்சான்றிதழ் முத்திரையின் உண்டித்தன்மையை சரிபார்த்துக் கொள்வதுடன், அதற்கான முறையான கொள்முதல் ரசீதையும் பெற்றுக்கொள்ளுமாறு அறிவுறுத்தப்படுகிறார்கள்.

மேலும், தரம் குறைந்த அல்லது உரிய சான்றிதழ் அற்ற தலைக்கவசங்களின் உற்பத்தி, விநியோகம் அல்லது விற்பனை குறித்த ஏதேனும் தகவல்கள் பொதுமக்களுக்குக் கிடைக்கும் பட்சத்தில், நுகர்வோர் உதவி மையத்தின் 1977 என்ற தொலைபேசி இலக்கத்தின் ஊடாக நுகர்வோர் விவகார அதிகார சபையைத் தொடர்புகொண்டு தெரிவிக்கலாம்.