SJB இன் அனைத்துப் பொறுப்புகளிலிருந்தும் அசோக் அபேசிங்க விலகல்
சமகி ஜன பலவேகயவின் (SJB) குருணாகல் தொகுதி முதன்மை அமைப்பாளர் பதவி உட்பட, தாம் வகித்து வந்த அனைத்துக் கட்சிப் பொறுப்புகளிலிருந்தும் முன்னாள் இராஜாங்க அமைச்சர் அசோக் அபேசிங்க விலகியுள்ளார்.
இது தொடர்பான உத்தியோகபூர்வக் கடிதத்தை சமகி ஜன பலவேகயவின் பொதுச்செயலாளர் ரஞ்சித் மத்தும பண்டாரவிடம் அவர் கையளித்துள்ளார்.
அதன்படி, கட்சியின் துணைப் பொதுச்செயலாளர், சமகி சேவக சங்கத்தின் தலைவர், எதிர்க்கட்சித் தலைவரின் தொழிற்சங்க ஒருங்கிணைப்புச் செயலாளர் மற்றும் கட்சியின் செயற்குழு உறுப்பினர் ஆகிய பொறுப்புகளிலிருந்தே அவர் இவ்வாறு ராஜினாமா செய்துள்ளார்.
கட்சி ஆரம்பிக்கப்பட்ட காலம் தொட்டே அதில் இணைந்து செயற்பட முடிந்ததையிட்டுத் தாம் மகிழ்ச்சியடைவதாகக் குறிப்பிட்டுள்ள அவர், கட்சியின் எதிர்கால நடவடிக்கைகளை முன்னோக்கி கொண்டு சென்று வெற்றியை அடைவதற்குப் பங்களிக்கும் அனைத்து உறுப்பினர்களுக்கும் தனது வாழ்த்துகளையும் தெரிவித்துக் கொண்டுள்ளார்.
