மாகாண சபைத் தேர்தல் முறைமை தொடர்பில் அரசியல் கட்சிகளிடம் கருத்துக் கோரும் நாடாளுமன்றக் குழு
எதிர்வரும் மாகாண சபைத் தேர்தல்களை நடத்துவதற்குப் பின்பற்றப்பட வேண்டிய தேர்தல் முறைமை தொடர்பில் பல்வேறு அரசியல் கட்சிகளிடம் நாடாளுமன்றத் தெரிவுக்குழு முன்மொழிவுகளையும் கருத்துக்களையும் கோரியுள்ளது.
நாடாளுமன்றத் தொடர்பாடல் திணைக்களத்தின் தகவலின்படி, அமைச்சர் விஜித ஹேரத் தலைமையில் நாடாளுமன்ற வளாகத்தில் அண்மையில் நடைபெற்ற தெரிவுக்குழுக் கூட்டத்தின்போதே இந்தக் கருத்துப் பரிமாற்றங்கள் இடம்பெற்றுள்ளன.
இதன்போது, ஈழ மக்கள் புரட்சிகர விடுதலை முன்னணி (EPRLF), ஈரோஸ் ஜனநாயக முன்னணி மற்றும் ஈழ மக்கள் ஜனநாயகக் கட்சி (EPDP) ஆகிய கட்சிகளின் பிரதிநிதிகள் தத்தமது கட்சிகளின் நிலைப்பாடுகள் மற்றும் தேர்தல் முறைமை தொடர்பான முன்மொழிவுகளை முன்வைத்துள்ளனர்.
மாகாண சபைகளில் பெண்கள் மற்றும் இளைஞர்களுக்குப் போதிய பிரதிநிதித்துவத்தை உறுதிப்படுத்துவது தொடர்பிலும் இதன்போது விசேட கவனம் செலுத்தப்பட்டுள்ளது.
இதன்படி, ஈழ மக்கள் புரட்சிகர விடுதலை முன்னணியின் சார்பில் கே. பிரேமச்சந்திரனும், ஈரோஸ் ஜனநாயக முன்னணியின் சார்பில் ராமசாமி ராஜேந்திரனும், ஈழ மக்கள் ஜனநாயகக் கட்சியின் சார்பில் சண்முகநாதன் சஞ்சீவனும் கலந்துகொண்டுள்ளனர்.
மாகாண சபைத் தேர்தல்களை நடத்துவதற்குப் பொருத்தமான தேர்தல் முறைமையை ஆராய்ந்து, அது தொடர்பான பரிந்துரைகளை நாடாளுமன்றத்திடம் சமர்ப்பிப்பதே குறித்த தெரிவுக்குழுவுக்கு வழங்கப்பட்டுள்ள பொறுப்பாகும்.
இந்தக் கூட்டத்தில் பிரதி அமைச்சர்களான முனீர் முலாபர், சுனில் வட்டகல மற்றும் அருண் ஹேமச்சந்திர ஆகியோருடன் நாடாளுமன்ற உறுப்பினர்களான தர்மப்பிரிய விஜேசிங்க, சமன்மலி குணசிங்க மற்றும் லக்ஷ்மன் நிபுண ஆரச்சி ஆகியோரும் கலந்துகொண்டுள்ளனர்.
தொடர்ச்சியான கலந்துரையாடல்களின் பின்னர், தேர்தல் முறைமை தொடர்பான இறுதிப் பரிந்துரைகளை நாடாளுமன்றத்திடம் சமர்ப்பிக்க தெரிவுக்குழு எதிர்பார்த்துள்ளது.
