மருத்துவர்களின் கோரிக்கைகளை முன்வைத்து கொழும்பில் GMOA போராட்டம்

அரச மருத்துவ அதிகாரிகள் சங்கம் (GMOA), மருத்துவர்களின் சம்பளம் மற்றும் கொடுப்பனவுகள் உள்ளிட்ட கோரிக்கைகளை முன்வைத்து இன்று (10) கொழும்பில் போராட்டமொன்றை முன்னெடுத்துள்ளது.

கொழும்பு தேசிய வைத்தியசாலைக்கு முன்பாக நடைபெற்ற இந்தப் போராட்டத்தில் கலந்துகொண்ட மருத்துவர்கள், தமது கோரிக்கைகளை வலியுறுத்தும் பதாகைகளையும் சுலோக அட்டைகளையும் ஏந்தியிருந்தனர்.

ஜனநாயக உரிமைகள் ஒடுக்கப்படுதல், அடிப்படை உரிமைகள் மறுக்கப்படுதல் மற்றும் தொழிற்சங்க செயற்பாட்டாளர்கள் பழிவாங்கப்படுதல் போன்ற நடவடிக்கைகளுக்கு எதிர்ப்புத் தெரிவிக்கும் வாசகங்கள் அடங்கிய பதாகைகளும் இதன்போது காட்சிப்படுத்தப்பட்டன.

அத்துடன், கருத்துச் சுதந்திரம், ஒன்றுகூடும் உரிமை மற்றும் சங்கம் அமைக்கும் உரிமை ஆகியவற்றைப் பாதுகாக்க வேண்டும் என்றும் போராட்டக்காரர்கள் வலியுறுத்தினர்.

குறிப்பாக, பயங்கரவாதத்திலிருந்து அரசைப் பாதுகாக்கும் சட்டமூலம் (PSTA) மற்றும் ஒழுங்கமைக்கப்பட்ட குற்றங்களைத் தடுக்கும் சட்டமூலம் (POCB) ஆகியவற்றை இரத்துச் செய்யுமாறும் போராட்டத்தில் கோரிக்கை விடுக்கப்பட்டது.

இதற்கு மேலதிகமாக, மருத்துவர்களுக்கான இடையூறு, கிடைப்புநிலை மற்றும் போக்குவரத்துக் கொடுப்பனவு (DAT) உள்ளிட்ட கொடுப்பனவுகள் தொடர்பான பிரச்சினைகளும் சுட்டிக்காட்டப்பட்டன.

மருத்துவர்களின் சம்பளம் மற்றும் கொடுப்பனவுகளில் மேற்கொள்ளப்பட்டுள்ள குறைப்புகள், உத்தியோகபூர்வ இல்லங்கள் தொடர்பான பிரச்சினைகள் உள்ளிட்ட நீண்டகாலமாகத் தீர்க்கப்படாத பல்வேறு விடயங்களுக்கு உரிய தீர்வுகளை வழங்குமாறு அரசாங்கத்திடம் கோரிக்கை விடுப்பதாக GMOA உதவிச் செயலாளர் சமில் விஜேசிங்க முன்னதாகத் தெரிவித்திருந்தார்.

எதிர்வரும் நவம்பர் 12ஆம் திகதி நாடாளுமன்றத்தில் சமர்ப்பிக்கப்படவுள்ள 2027ஆம் ஆண்டுக்கான வரவு செலவுத் திட்டத்தின் ஊடாக இந்தப் பிரச்சினைகளுக்குத் தீர்வு வழங்கப்பட வேண்டும் என்றும் அவர் வலியுறுத்தியிருந்தார்.

இந்தப் போராட்டம் வேலைநிறுத்தப் போராட்டம் அல்ல எனத் தெரிவித்த அவர், நாடளாவிய ரீதியிலுள்ள வைத்தியசாலைகளில் நோயாளர்களுக்கான மருத்துவ சேவைகள் எவ்வித தடையுமின்றி முன்னெடுக்கப்படுவதற்கான ஏற்பாடுகள் செய்யப்பட்டுள்ளதாகவும் குறிப்பிட்டிருந்தார்.

அதேவேளை, தற்போதைய போராட்டம் முதலாவது கட்ட நடவடிக்கை மாத்திரமே எனவும், அரசாங்கம் தமது கோரிக்கைகளுக்குத் தீர்வு வழங்கத் தவறினால் அடுத்தகட்ட நடவடிக்கைகள் முன்னெடுக்கப்படும் எனவும் GMOA உதவிச் செயலாளர் எச்சரித்துள்ளார்.