அமெரிக்காவில் குடியிருப்புப் பகுதியில் தனியார் விமானம் விபத்து – 9 பேர் உயிரிழப்பு!

அமெரிக்காவின் தெற்கு புளோரிடா மாநிலத்தில் குடியிருப்புப் பகுதியில் தனியார் வர்த்தக விமானம் ஒன்று விபத்துக்குள்ளானதில் 9 பேர் உயிரிழந்துள்ளனர்.

விமானத்தில் பயணித்த அனைவரும் இந்த விபத்தில் உயிரிழந்துள்ளதாக அமெரிக்க போக்குவரத்துச் செயலாளர் சீன் டஃபி தெரிவித்துள்ளார். இந்தச் சம்பவம் மிகக் கொடூரமான துயரச் சம்பவம் என அவர் தனது எக்ஸ் (X) சமூக வலைத்தளப் பதிவில் குறிப்பிட்டுள்ளார்.

விபத்து தொடர்பான விசாரணைகளுக்கு ஆதரவளிப்பதற்காக அமெரிக்க மத்திய விமானப் போக்குவரத்து நிர்வாகத்தின் (FAA) அதிகாரிகள் சம்பவ இடத்திற்குச் சென்றுள்ளதாகவும், தேசிய போக்குவரத்துப் பாதுகாப்புச் சபை (NTSB) விசாரணைகளை முன்னெடுத்து வருவதாகவும் அவர் தெரிவித்துள்ளார்.

விபத்துக்கு சில நிமிடங்களுக்கு முன்னர் விமானத்தின் விமானி அறையில் இடம்பெற்ற உரையாடல்கள் வெளியாகியுள்ளன. LiveATC.net இணையத்தளத்தில் பதிவாகியுள்ள அந்த ஒலிப்பதிவில், விமானத்தின் மீது பனிப்படலம் படிவது தொடர்பான பிரச்சினைகளைக் கட்டுப்படுத்தக்கூடிய நிலையில் இருப்பதாக விமானி ஆரம்பத்தில் தெரிவித்துள்ளார்.

எனினும், பின்னர் விமானம் மிக வேகமாக உயரத்தை இழந்து வருவதாக அவர் குறிப்பிட்டுள்ளார். இதனையடுத்து பதற்றமடைந்த விமானப் பணியாளர்கள், விமானம் தரையில் மோதப்போவதாகக் குரல் எழுப்பியுள்ளனர்.

டெக்சாஸ் மாநிலத்தின் ஆஸ்டின் நகரிலிருந்து பஹாமாஸ் தீவுகளை நோக்கிப் பயணித்த லியர்ஜெட் 60 (Learjet 60) ரக வர்த்தக விமானமே இவ்வாறு விபத்துக்குள்ளாகியுள்ளது.

இந்த விமானம் தனியார் விமானம் என்பதை ஆஸ்டின்-பெர்க்ஸ்ட்ரோம் சர்வதேச விமான நிலையம் உறுதிப்படுத்தியுள்ளதுடன், அதில் பயணித்தவர்களின் அடையாளங்கள் குறித்த தகவல்கள் வெளியிடப்படவில்லை.

விபத்து தொடர்பான காணொளிகள் சமூக வலைத்தளங்களில் வெளியாகியுள்ளன. அவற்றில், விமானம் அதிக வேகத்தில் செங்குத்தான கோணத்தில் தரையை நோக்கி வந்து மோதுவதும், அதனைத் தொடர்ந்து பாரிய வெடிப்புச் சம்பவம் ஏற்படுவதும் பதிவாகியுள்ளது.

விபத்துக்குப் பின்னர் சம்பவ இடத்தில் விமானத்தின் சிதைவுகள் மற்றும் சாலைப் பகுதிகளில் தீப்பிழம்புகள் காணப்பட்டதாகவும், அப்பகுதியில் பொதுமக்கள் திரண்டிருந்ததாகவும் தெரிவிக்கப்படுகிறது.

விமானம் வீடுகள் மற்றும் வாகனங்களுக்கு மிக அருகில் விழுந்திருந்த போதிலும், தரையில் இருந்த எவருக்கும் உயிரிழப்பு ஏற்படவில்லை என புளோரிடா ஆளுநர் ரொன் டிசாண்டிஸ் தெரிவித்துள்ளார்.

சம்பவ இடத்திலிருந்து கருத்துத் தெரிவித்த அவர், இந்த விபத்தை மிகப் பாரிய அழிவை ஏற்படுத்திய சம்பவம் என வர்ணித்துள்ளார். மேலும், விமானம் ஏவுகணை ஒன்று தரையை நோக்கி விழுவதைப் போன்று காணப்பட்டதாகவும், சாலையோரத்தில் மிகப்பெரிய பள்ளம் ஒன்றை ஏற்படுத்தியுள்ளதாகவும் குறிப்பிட்டுள்ளார்.