வரலாறு காணாத கிரிப்டோ கொள்ளை: Binance தளத்திலிருந்து 360 கோடி டொலர் பணத்தை மீளப்பெற்ற பயனர்கள்!

உலகின் முன்னணி கிரிப்டோகரன்சி பரிமாற்றத் தளமான Binance மீது நடத்தப்பட்ட வரலாறு காணாத சைபர் தாக்குதலைத் தொடர்ந்து, அத்தளத்தின் பயனர்கள் சுமார் 3.6 பில்லியன் அமெரிக்க டொலர் பெறுமதியான பணத்தை மீளப்பெற்றுள்ளனர்.

கடந்த வியாழக்கிழமை இடம்பெற்ற இந்தச் சைபர் தாக்குதலில், வாடிக்கையாளர்களுக்குச் சொந்தமான சுமார் 6.3 பில்லியன் அமெரிக்க டொலர் பெறுமதியான கிரிப்டோ சொத்துக்கள் திருடப்பட்டதாகத் தெரிவிக்கப்பட்டுள்ளது. இது வரலாற்றிலேயே மிகப்பெரிய நிதிக் கொள்ளைகளில் ஒன்றாகக் கருதப்படுகிறது.

இந்தத் தாக்குதலுக்குப் பின்னால் வடகொரியாவைச் சேர்ந்த சைபர் குற்றவாளிகள் இருக்கலாம் என ஆரம்பத்தில் சந்தேகிக்கப்பட்ட நிலையில், அமெரிக்காவின் மத்திய புலனாய்வுப் பிரிவான FBI, வடகொரியாவுடன் தொடர்புடைய 'TraderTraitor' என்ற குழுவே இதற்குப் பொறுப்பானது என உறுதிப்படுத்தியுள்ளது.

தாக்குதல் தொடர்பான விசாரணைகளை முன்னெடுப்பதற்காக Binance நிறுவனம் ஆரம்பத்தில் பண மீளப்பெறுதல்களைத் தற்காலிகமாக நிறுத்தியிருந்தது. எனினும், ஞாயிற்றுக்கிழமை முதல் கட்டங்களாகப் பண மீளப்பெறுதல்களை மீண்டும் அனுமதிக்கத் தொடங்கியுள்ளது.

ஞாயிற்றுக்கிழமை பிற்பகல் வரையில், Binance தளத்தின் ஊடாக 4.6 பில்லியன் டொலர் பெறுமதியான பண மீளப்பெறுதல்கள் மேற்கொள்ளப்பட்டுள்ளதுடன், சுமார் 1 பில்லியன் டொலர் புதிய வைப்புகளும் மேற்கொள்ளப்பட்டுள்ளன.

இதன்படி, மொத்தமாக சுமார் 3.6 பில்லியன் டொலர் பெறுமதியான நிதி தளத்திலிருந்து வெளியேறியுள்ளது. இது Binance நிறுவனத்தின் மொத்த நிர்வாகத்தின் கீழுள்ள 171 பில்லியன் டொலர் சொத்துக்களில் 2.1 சதவீதமாகும்.

நிறுவனத்தின் சமீபத்திய சொத்து இருப்பு அறிக்கையிலும் இந்தத் தரவுகள் உறுதிப்படுத்தப்பட்டுள்ளன. முழுமையான அறிக்கை திங்கட்கிழமை வெளியிடப்படும் என எதிர்பார்க்கப்படுகிறது.

இது தொடர்பில் Binance நிறுவனம் வெளியிட்டுள்ள அறிக்கையில், ஆரம்பத்தில் அதிகரித்திருந்த பண மீளப்பெறுதல்கள் தற்போது குறைந்து நிலைபெற்று வருவதாகவும், புதிய வைப்புகள் தொடர்ந்தும் கணிசமான அளவில் இடம்பெறுவதாகவும் தெரிவித்துள்ளது.

மேலும், வாடிக்கையாளர்களின் நிதியைப் பாதுகாப்பாகவும் நம்பகமான முறையிலும் அணுகுவதற்கான வசதிகளை மீளமைப்பதில் நிறுவனம் கவனம் செலுத்தி வருவதாகவும் குறிப்பிட்டுள்ளது.

முதற்கட்டமாக Ethereum, USDT, USDC உள்ளிட்ட 15 வகையான வலையமைப்புகள் மற்றும் கிரிப்டோ சொத்துக்களுக்கான பண மீளப்பெறுதல்கள் மீண்டும் ஆரம்பிக்கப்பட்டுள்ளன. பின்னர் Dogecoin மற்றும் Avalanche ஆகிய கிரிப்டோகரன்சிகளுக்கான பரிவர்த்தனைகளும் அவற்றின் சொந்த வலையமைப்புகளில் மீள ஆரம்பிக்கப்பட்டுள்ளன.

இதற்கிடையில், திருடப்பட்ட சொத்துக்களில் 90 சதவீதத்தை மீண்டும் கொள்வனவு செய்து ஈடுசெய்துள்ளதாக Binance நிறுவனம் தெரிவித்துள்ளது. எஞ்சியுள்ள 10 சதவீத சொத்துக்கள் சந்தையில் குறைந்த அளவில் கிடைக்கக்கூடியவையாக இருப்பதால், அவற்றை மீளப்பெறுவதற்குக் கூடுதல் காலம் தேவைப்படலாம் எனவும் கூறியுள்ளது.

நிறுவனத்தின் இணை பிரதம நிறைவேற்று அதிகாரியான ரிச்சர்ட் டெங், எஞ்சியுள்ள 10 சதவீத இழப்பையும் நிறுவனம் முழுமையாக ஈடுசெய்யும் என்றும், இந்தச் சம்பவத்தால் வாடிக்கையாளர்கள் எந்தவிதமான நிதி இழப்பையும் எதிர்கொள்ள வேண்டியிருக்காது என்றும் உறுதியளித்துள்ளார்.

இதனிடையே, இந்தத் தாக்குதலுடன் தொடர்புடையவர்கள் திருடப்பட்ட கிரிப்டோ சொத்துக்களை Ethereum ஆக மாற்றி வருவதாக FBI தெரிவித்துள்ளது. மேலும், பரவலாக்கப்பட்ட நிதிச் சேவைகள் மற்றும் உடனடி பரிமாற்றச் சேவைகள் ஊடாக அந்தச் சொத்துக்கள் தொடர்ந்து வேறு வடிவங்களுக்கு மாற்றப்பட்டு, சட்டவிரோதப் பணப் பரிமாற்றம் மேற்கொள்ளப்படலாம் எனவும் எச்சரித்துள்ளது.

இந்தத் தாக்குதலின்போது, மடிக்கணினி ஒன்றின் கட்டுப்பாட்டைக் கைப்பற்றியதுடன், தனது செயற்பாடுகள் தொடர்பான தடயங்களை அழிக்கும் தீங்கிழைக்கும் மென்பொருளையும் தாக்குதலாளர்கள் பயன்படுத்தியுள்ளதாக ரிச்சர்ட் டெங் தெரிவித்துள்ளார். இதனால் விசாரணைகளை முன்னெடுப்பது சிக்கலானதாக மாறியுள்ளதாகவும் அவர் குறிப்பிட்டுள்ளார்.

திருடப்பட்ட நிதியை ஈடுசெய்வதற்காக சுமார் 6.34 பில்லியன் டொலர் பெறுமதியான நிறுவன நிதியை ஒதுக்கியுள்ளதாக Binance தெரிவித்துள்ளது. வாடிக்கையாளர்களுக்கான பாதுகாப்பு நிதி, Bitcoin கையிருப்பு, எதிர்கால வர்த்தகங்களுக்கான காப்பீட்டு நிதி மற்றும் நிறுவனத்தின் சொந்த நிதி ஆகியவற்றிலிருந்து இந்தத் தொகை பயன்படுத்தப்பட்டுள்ளதாகவும் தெரிவிக்கப்பட்டுள்ளது.

இந்தச் சைபர் தாக்குதல் குறித்த தகவல் வெளியானதைத் தொடர்ந்து சர்வதேச கிரிப்டோகரன்சி சந்தையிலும் வீழ்ச்சி ஏற்பட்டுள்ளது. Bitcoin பெறுமதி சுமார் 5 சதவீதமும், Ethereum பெறுமதி சுமார் 6 சதவீதமும் சரிவடைந்துள்ளன. Binance நிறுவனத்தின் சொந்த கிரிப்டோகரன்சியான BNB சுமார் 10 சதவீதம் வீழ்ச்சியடைந்துள்ளது.

அண்மைக்காலமாக செயற்கை நுண்ணறிவுத் தொழில்நுட்பத்தின் வளர்ச்சி, இணையப் பாதுகாப்பு மற்றும் குறியாக்கத் தொழில்நுட்பங்களுக்கு ஏற்படுத்தக்கூடிய அச்சுறுத்தல்கள் குறித்த கவலைகள் அதிகரித்துள்ள நிலையில், இந்தத் தாக்குதல் கிரிப்டோகரன்சி பாதுகாப்பு தொடர்பான விவாதங்களையும் தீவிரப்படுத்தியுள்ளது.

சர்வதேச பொருளாதாரத் தடைகளை எதிர்கொண்டு வரும் வடகொரியா, தனது அணுவாயுத மற்றும் ஏவுகணைத் திட்டங்களுக்கான வருவாயைப் பெற்றுக்கொள்வதற்கு சட்டவிரோத இணைய வழிமுறைகளைப் பயன்படுத்தி வருவதாகப் பல்வேறு தரப்பினரும் குற்றஞ்சாட்டி வருகின்றனர். இந்நிலையில், Binance மீதான இந்தத் தாக்குதல் வடகொரியாவின் இணையவழிக் குற்றச் செயல்கள் தொடர்பான சர்வதேச கவனத்தை மீண்டும் அதிகரித்துள்ளது.