கால்நடை மருத்துவர்களுக்கு எதிராக ஒழுக்காற்று நடவடிக்கை எடுப்பதற்கான புதிய விதிமுறைகளுக்கு அமைச்சரவை அங்கீகாரம்

தொழில்முறை ஒழுக்க விதிகளை மீறும் கால்நடை மருத்துவர்கள் மற்றும் கால்நடை மருத்துவப் பயிற்சியாளர்களுக்கு எதிராக ஒழுக்காற்று நடவடிக்கைகளை வலுப்படுத்தும் நோக்கில் புதிய விதிமுறைகளை நாடாளுமன்றத்தில் சமர்ப்பிப்பதற்கு அமைச்சரவை அங்கீகாரம் வழங்கியுள்ளது.

இதற்கமைய, இலங்கை கால்நடை மருத்துவ சபைக்கு தொழில்முறை தவறுகளில் ஈடுபடும் மருத்துவர்களின் பதிவைத் தற்காலிகமாக இடைநிறுத்துதல், பதிவை இரத்துச் செய்தல் மற்றும் எச்சரிக்கை விடுத்தல் உள்ளிட்ட ஒழுக்காற்று நடவடிக்கைகளை மேற்கொள்ள அதிகாரம் வழங்கப்படவுள்ளது.

மேலும், தொழில்முறை ஒழுக்கமீறல், அதிகாரத்தைத் தவறாகப் பயன்படுத்துதல் மற்றும் கால்நடை மருத்துவத் துறையில் அவப்பெயரை ஏற்படுத்தக்கூடிய ஏனைய செயற்பாடுகள் அல்லது செயற்படத் தவறுதல் தொடர்பான வரைவிலக்கணங்களும் இந்தப் புதிய விதிமுறைகளில் உள்ளடக்கப்பட்டுள்ளன.

அத்துடன், கால்நடை மருத்துவர்களுக்கு எதிரான ஒழுக்கமீறல் குற்றச்சாட்டுகளை விசாரணை செய்வதற்காக விசாரணைக் குழுக்களை நியமிக்கும் நடைமுறைகளும் இதில் குறிப்பிடப்பட்டுள்ளன.

1956ஆம் ஆண்டின் 46ஆம் இலக்க கால்நடை மருத்துவர்கள் மற்றும் கால்நடை மருத்துவப் பயிற்சியாளர்கள் சட்டத்தின் கீழ் இந்த விதிமுறைகள் தயாரிக்கப்பட்டுள்ளன. இலங்கையில் கால்நடை மருத்துவர்களைப் பதிவு செய்தல், அவர்களுக்கான தகைமைகளைத் தீர்மானித்தல் மற்றும் தொழில்துறையை ஒழுங்குபடுத்துதல் ஆகியவற்றுக்கான சட்டக் கட்டமைப்பை இந்தச் சட்டம் வழங்குகிறது.

2025ஆம் ஆண்டின் இலக்கம் 1 கொண்ட கால்நடை மருத்துவர்கள் மற்றும் கால்நடை மருத்துவப் பயிற்சியாளர்களின் அவப்பெயருக்குரிய நடத்தை தொடர்பான விதிமுறைகள், 2026 ஜனவரி 5ஆம் திகதியிடப்பட்ட 2470/12ஆம் இலக்க விசேட வர்த்தமானி அறிவித்தல் மூலம் வெளியிடப்பட்டிருந்தன.

இந்நிலையில், விவசாயம், கால்நடை வளங்கள், காணி மற்றும் நீர்ப்பாசன அமைச்சர் முன்வைத்த குறித்த விதிமுறைகளை நாடாளுமன்றத்தின் அங்கீகாரத்திற்காகச் சமர்ப்பிப்பதற்கான முன்மொழிவுக்கே அமைச்சரவை அனுமதி வழங்கியுள்ளது.