மூன்று மாத தொடர் விலை அதிகரிப்புக்குப் பின்னர் எரிபொருள் விலைகளைக் குறைத்தது ஐக்கிய அரபு இராச்சியம்!

ஐக்கிய அரபு இராச்சியத்தில் (UAE) எதிர்வரும் நவம்பர் மாதத்திற்கான பெற்றோல் மற்றும் டீசல் விலைகள் குறைக்கப்பட்டுள்ளதாக அறிவிக்கப்பட்டுள்ளது.

கடந்த மூன்று மாதங்களாகத் தொடர்ச்சியாக எரிபொருள் விலைகள் அதிகரிக்கப்பட்டு வந்த நிலையில், தற்போது விலைகள் குறைக்கப்பட்டுள்ளமை வாகன உரிமையாளர்களுக்கு ஓரளவு நிவாரணத்தை வழங்கியுள்ளது.

இதன்படி, ஒக்டோபர் மாதத்தில் ஒரு லீற்றர் 4.40 திர்ஹமாக விற்பனை செய்யப்பட்ட Super 98 ரக பெற்றோலின் விலை, நவம்பர் மாதத்தில் 4.16 திர்ஹமாகக் குறைக்கப்பட்டுள்ளது. இதன்படி, சுமார் 376 இலங்கை ரூபாவுக்கு இவ்வகை பெற்றோலைப் பெற்றுக்கொள்ள முடியும்.

அதேபோன்று, Special 95 ரக பெற்றோலின் விலை 4.28 திர்ஹமிலிருந்து 4.04 திர்ஹமாகக் குறைக்கப்பட்டுள்ளது. இதன் இலங்கை ரூபா பெறுமதி சுமார் 366 ரூபாவாகும்.

E-Plus 91 ரக பெற்றோலின் விலையும் 4.21 திர்ஹமிலிருந்து 3.97 திர்ஹமாகக் குறைக்கப்பட்டுள்ளது. இதன்படி, ஒரு லீற்றர் பெற்றோலின் விலை சுமார் 359 இலங்கை ரூபாவாக இருக்கும்.

இதற்கிடையில், டீசல் விலையும் ஒரு லீற்றருக்கு 4.80 திர்ஹமிலிருந்து 4.75 திர்ஹமாகக் குறைக்கப்பட்டுள்ளது. இதன் இலங்கை ரூபா பெறுமதி சுமார் 430 ரூபாவாகும்.

இந்த புதிய விலைகள் எதிர்வரும் நவம்பர் முதலாம் திகதி முதல் ஐக்கிய அரபு இராச்சியம் முழுவதும் நடைமுறைக்கு வரவுள்ளன.

இதன்படி, பெற்றோல் விலைகள் சுமார் 5.5 முதல் 5.7 சதவீதம் வரையிலும், டீசல் விலை சுமார் ஒரு சதவீதமும் குறைக்கப்பட்டுள்ளன.

மத்திய கிழக்கில் நிலவும் மோதல் சூழ்நிலையால் சர்வதேச எரிசக்தி சந்தையில் ஏற்பட்டுள்ள விலை ஏற்ற இறக்கங்களுக்கு மத்தியில், கடந்த மூன்று மாதங்களாக எரிபொருள் விலைகள் அதிகரிக்கப்பட்டிருந்தன.

இந்நிலையில், சர்வதேச சந்தையின் நிலவரங்களுக்கு ஏற்ப ஐக்கிய அரபு இராச்சியம் மாதாந்தம் தனது உள்நாட்டு எரிபொருள் விலைகளை மீளாய்வு செய்து மாற்றியமைத்து வருகின்றமை குறிப்பிடத்தக்கது.