பாகிஸ்தான் மனித உரிமைச் செயற்பாட்டாளர் இமான் மசாரி உள்ளிட்ட இருவருக்கு 10 ஆண்டுகள் சிறை

பாகிஸ்தானின் பிரபல மனித உரிமைச் சட்டத்தரணியான இமான் மசாரி மற்றும் அவரது கணவர் ஹாடி அலி சத்தா ஆகியோருக்கு பயங்கரவாதம் தொடர்பான குற்றச்சாட்டுகளின் கீழ் 10 ஆண்டுகள் சிறைத்தண்டனை விதிக்கப்பட்டுள்ளது.

பாகிஸ்தானின் ராவல்பிண்டி நகரில் உள்ள அடியாலா சிறைச்சாலையில் நடைபெற்ற விசாரணையின் பின்னர், பயங்கரவாத எதிர்ப்பு நீதிமன்ற நீதிபதி தாஹிர் அப்பாஸ் சிப்ரா நேற்று வியாழக்கிழமை (29) இந்தத் தீர்ப்பை அறிவித்துள்ளார்.

இங்கிலாந்து மற்றும் வேல்ஸ் கிரிக்கெட் அணியின் பாதுகாப்புக்கு ஆபத்தை ஏற்படுத்தியதாகக் குற்றஞ்சாட்டப்பட்டுள்ள இந்தத் தம்பதியினர், பொதுமக்களிடையே அச்சத்தை ஏற்படுத்தும் நோக்கத்துடன் செயற்பட்டதாக நீதிமன்றத் தீர்ப்பில் குறிப்பிடப்பட்டுள்ளது.

எனினும், குறித்த சம்பவம் வீதித் தடையொன்றை அகற்றிய சாதாரணமான சம்பவமாகவே தோன்றுவதாகவும் தீர்ப்பில் சுட்டிக்காட்டப்பட்டுள்ளதாக ஏ.எப்.பி. செய்தி நிறுவனம் தெரிவித்துள்ளது.

வீதித் தடைகளை அகற்றிய சம்பவம்

கடந்த 2024ஆம் ஆண்டு ஒக்டோபர் மாதம், இங்கிலாந்து கிரிக்கெட் அணி பாகிஸ்தானுக்கு சுற்றுப்பயணம் மேற்கொண்டிருந்தபோது, இஸ்லாமாபாத் நகரில் அந்த அணியின் பயணத்துக்காக ஒதுக்கப்பட்டிருந்த வீதியிலிருந்த தடைகளை இமான் மசாரியும் அவரது கணவரும் அகற்றியதாகக் குற்றஞ்சாட்டப்பட்டது.

இதனையடுத்து, பொலிஸாரின் கடமைகளுக்கு இடையூறு விளைவித்தமை மற்றும் பொதுமக்களைத் தூண்டிவிட்டமை உள்ளிட்ட குற்றச்சாட்டுகளின் கீழ் அவர்கள் மீது வழக்குத் தொடரப்பட்டது.

கடந்த ஒக்டோபர் 7ஆம் திகதி குற்றப்பத்திரிகை தாக்கல் செய்யப்பட்ட நிலையில், தம்பதியினர் தங்களுக்கு எதிரான குற்றச்சாட்டுகளை நிராகரித்திருந்தனர்.

தாங்கள் மனித உரிமைகளுக்காகப் பணியாற்றுவதன் காரணமாகவே இலக்கு வைக்கப்பட்டுள்ளதாகவும், தங்களை மனச்சாட்சியின் அடிப்படையில் சிறையில் அடைக்கப்பட்ட கைதிகளாகக் கருதுவதாகவும் அவர்கள் தெரிவித்திருந்தனர்.

அரசாங்கத்தின் அடக்குமுறை மற்றும் அநீதிக்கு எதிராகக் குரல் கொடுப்பவர்களை அச்சுறுத்தும் நோக்கில் தங்களை உதாரணமாகக் காட்டுவதற்கு அதிகாரிகள் முயற்சிப்பதாகவும் அவர்கள் தமது பாதுகாப்பு ஆவணத்தில் குறிப்பிட்டிருந்தனர்.

நீதிமன்ற விசாரணைக்கு எதிராகக் கடும் விமர்சனம்

இமான் மசாரியின் தாயாரும், முன்னாள் பிரதமர் இம்ரான் கான் தலைமையிலான அரசாங்கத்தில் மனித உரிமைகள் அமைச்சராகப் பணியாற்றியவருமான ஷிரீன் மசாரி, இந்த விசாரணையை முறையான சட்ட நடைமுறைகள் பின்பற்றப்படாத போலியான விசாரணை என விமர்சித்துள்ளார்.

தனது மகளும் மருமகனும் தங்களுக்குச் சார்பான சட்டத்தரணி ஊடாகத் தங்களைப் பாதுகாத்துக்கொள்ள அனுமதிக்கப்படவில்லை என்றும், முக்கியமான சட்ட ஆவணங்கள் அவர்களுக்கு வழங்கப்படவில்லை என்றும் அவர் தெரிவித்துள்ளார்.

இந்தத் தீர்ப்புக்கு எதிராக உச்ச நீதிமன்றத்தில் மனுத் தாக்கல் செய்யவுள்ளதாகவும் ஷிரீன் மசாரி குறிப்பிட்டுள்ளார்.

இதேவேளை, சர்வதேச மன்னிப்புச் சபை (Amnesty International) இந்தத் தண்டனைத் தீர்ப்புகளைக் கடுமையாக விமர்சித்துள்ளது.

நியாயமான விசாரணைக்கான உரிமையையும் நீதியின் அடிப்படைக் கொள்கைகளையும் பாதுகாப்பதில் பாகிஸ்தானின் நீதித்துறை தோல்வியடைந்துள்ளதாக அந்த அமைப்பின் பிரதிநிதி யாஸ்மின் அஹ்மட் தெரிவித்துள்ளார்.

மனித உரிமைகளுக்காகக் குரல் கொடுத்ததற்காகவே இமான் மசாரியும் ஹாடி அலி சத்தாவும் தண்டிக்கப்படுவதாகவும், பயங்கரவாத எதிர்ப்புச் சட்டங்கள் அவர்களுக்கு எதிராகப் பயன்படுத்தப்படுவதாகவும் அவர் குற்றஞ்சாட்டியுள்ளார்.

மற்றொரு வழக்கிலும் சிறைத்தண்டனை

இமான் மசாரியும் அவரது கணவரும் சமூக ஊடகப் பதிவுகள் தொடர்பான மற்றொரு வழக்கில் கடந்த ஜனவரி 23ஆம் திகதி முதல் பொலிஸ் காவலில் வைக்கப்பட்டுள்ளனர்.

இந்த வழக்கில், பாகிஸ்தானின் இலத்திரனியல் குற்றங்கள் தடுப்புச் சட்டத்தின் கீழ் இருவருக்கும் தலா 17 ஆண்டுகள் சிறைத்தண்டனை விதிக்கப்பட்டிருந்தது.

எனினும், பின்னர் பாகிஸ்தான் உச்ச நீதிமன்றம் அந்தத் தண்டனைகளை இடைநிறுத்தியது. இதையடுத்து, அதே நாளில் வீதித் தடைகளை அகற்றிய சம்பவம் தொடர்பான வழக்கில் பொலிஸார் அவர்களை மீண்டும் கைது செய்தனர்.

இந்த மீள்கைது, மனித உரிமைப் பணிகளுக்காக இருவரையும் தண்டிக்கும் அரசியல் நோக்கத்துடனான முயற்சியே அவர்களுக்கு எதிரான வழக்குகள் என்பதை வெளிப்படுத்துவதாக சர்வதேச மன்னிப்புச் சபையின் தெற்காசியப் பிராந்திய பிரதி இயக்குநர் பாபு ராம் பான்ட் தெரிவித்துள்ளார்.

விமர்சனக் குரல்களுக்கு எதிராக சட்டக் கட்டமைப்பை அதிகாரிகள் பயன்படுத்துவதற்கு இந்த வழக்கு மற்றுமொரு உதாரணமாக அமைந்துள்ளதாகவும் அவர் குறிப்பிட்டுள்ளார்.

இதற்கிடையில், பாகிஸ்தானின் நீதித்துறை சுதந்திரமாகச் செயற்படுவதாக அந்நாட்டின் சட்ட அமைச்சர் அசாம் நசீர் தாரார் தொடர்ச்சியாகத் தெரிவித்து வருகின்றமை குறிப்பிடத்தக்கது.