பச்சை குத்தினால் சிறைத் தண்டனையா? – நீதி அமைச்சர் விளக்கம்

இலங்கையில் முன்மொழியப்பட்டுள்ள ஒழுங்கமைக்கப்பட்ட குற்றங்களைத் தடுக்கும் சட்டமூலத்தின் கீழ், பச்சை குத்துதல், நீண்ட தலைமுடி வைத்திருத்தல் அல்லது குறிப்பிட்ட ஆடைகளை அணிதல் போன்ற காரணங்களுக்காக மாத்திரம் எவரையும் கைது செய்யவோ சிறையில் அடைக்கவோ முடியாது என நீதி அமைச்சர் ஹர்ஷன நாணயக்கார தெரிவித்துள்ளார்.

நாடாளுமன்றத்தில் செவ்வாய்க்கிழமை (20) உரையாற்றிய அவர், குறித்த சட்டமூலம் தொடர்பில் சமூக ஊடகங்களில் தவறான விளக்கங்கள் பரப்பப்படுவதாகவும், இதனால் பொதுமக்கள் மத்தியில் தேவையற்ற அச்சம் ஏற்பட்டுள்ளதாகவும் குறிப்பிட்டார்.

ஒழுங்கமைக்கப்பட்ட குற்றக் குழுக்களால் மேற்கொள்ளப்படும் குற்றங்களை விசாரிப்பதற்கும், குற்றவாளிகளுக்கு எதிராக வழக்குத் தொடர்வதற்கும், இத்தகைய குற்றங்களைத் தடுப்பதற்கும் புதிய சட்ட ஏற்பாடுகளை அறிமுகப்படுத்தும் நோக்கில் இந்தச் சட்டமூலம் நாடாளுமன்றத்தில் முதலாம் வாசிப்புக்காகச் சமர்ப்பிக்கப்பட்டுள்ளது.

தமக்குப் பிடித்த ஆடைகளை அணிதல், பச்சை குத்துதல் மற்றும் விரும்பிய தலைமுடி அலங்காரத்தைப் பின்பற்றுதல் ஆகியவை அடிப்படை உரிமைகள் என அமைச்சர் தெரிவித்தார்.

முன்மொழியப்பட்டுள்ள சட்டமூலத்தின் 4(2) ஆவது பிரிவை விளக்கிய அவர், ஒருவர் ஒழுங்கமைக்கப்பட்ட குற்றக் குழுவொன்றுடன் தொடர்புடையவரா என்பதைத் தீர்மானிப்பதற்காக 12 காரணிகளைக் கருத்தில் கொள்ள முடியும் எனக் குறிப்பிட்டார்.

குறித்த காரணிகளில், ஒழுங்கமைக்கப்பட்ட குற்றக் குழுக்களின் உறுப்பினர்களால் பொதுவாகப் பயன்படுத்தப்படும் ஆடை அணியும் முறைகள், கைகளால் காட்டப்படும் சைகைகள், மொழிப் பயன்பாடு மற்றும் பச்சை குத்தல்கள் ஆகியவையும் உள்ளடங்குகின்றன.

எனினும், இவை தனித்தனியான குற்றங்களாகக் கருதப்படுவதில்லை என அமைச்சர் வலியுறுத்தினார். சாதாரண நபர்களின் வெளிப்புறத் தோற்றத்தை அடிப்படையாகக் கொண்டு அவர்களைக் குற்றவாளிகளாகக் கருதுவது இந்தச் சட்டமூலத்தின் நோக்கமல்ல என்றும் அவர் தெளிவுபடுத்தினார்.

இந்த ஏற்பாடு, மறுத்து நிரூபிக்கக்கூடிய சட்ட அனுமானம் (Rebuttable Presumption) எனக் குறிப்பிட்ட அவர், இத்தகைய அடையாளங்கள் ஒருவரின் குற்றத் தொடர்பை உறுதிப்படுத்தும் இறுதியான சான்றுகளாக அமையாது என்றும் தெரிவித்தார்.

ஒழுங்கமைக்கப்பட்ட குற்றக் குழுக்களின் உறுப்பினர்களை அடையாளம் காண்பதற்காக ஜப்பான், அமெரிக்கா, அவுஸ்திரேலியா மற்றும் சிங்கப்பூர் உள்ளிட்ட நாடுகளிலும் இதுபோன்ற அடையாளங்கள் விசாரணைகளின்போது பயன்படுத்தப்படுவதாக அவர் சுட்டிக்காட்டினார்.

போதைப்பொருள் கடத்தல், கொலைகள், ஆட்கடத்தல்கள் மற்றும் ஏனைய பாரதூரமான குற்றங்கள் உள்ளிட்ட ஒழுங்கமைக்கப்பட்ட குற்றச் செயல்களுக்கு எதிரான சட்ட அமுலாக்க நடவடிக்கைகளை வலுப்படுத்துவதே இந்தச் சட்டமூலத்தின் பிரதான நோக்கம் என்றும் அமைச்சர் குறிப்பிட்டார்.

ஒழுங்கமைக்கப்பட்ட குற்ற வலையமைப்புகளுடன் தொடர்புடைய சில நடவடிக்கைகளைத் திறம்பட விசாரித்து, குற்றவாளிகளுக்கு எதிராக வழக்குத் தொடர்வதற்குப் தற்போதுள்ள சட்டங்கள் போதுமானதாக இல்லை என்றும் அவர் தெரிவித்தார்.

அதேவேளை, சட்டமூலம் தொடர்பான விமர்சனங்களை அரசாங்கம் வரவேற்பதாகவும், நாடாளுமன்ற விவாதங்களின்போது முன்வைக்கப்படும் ஆக்கபூர்வமான பரிந்துரைகளைப் பரிசீலிக்கத் தயாராக இருப்பதாகவும் அமைச்சர் கூறினார்.

இந்தச் சட்டமூலம் அரசியலமைப்பின் அடிப்படை உரிமைகளை மீறுவதாகக் கருதுபவர்கள், அது தொடர்பில் உயர் நீதிமன்றத்தில் சவால் விடுக்க முடியும் என்றும் அவர் தெரிவித்தார்.

சில அரசியல் குழுக்களும் சமூக ஊடகக் கருத்தாளர்களும் அரசியல் நோக்கங்களுக்காகச் சட்டமூலத்தைத் தவறாகச் சித்தரிப்பதாகவும் அமைச்சர் குற்றஞ்சாட்டினார்.

பச்சை குத்துதல், நீண்ட தலைமுடி வைத்திருத்தல் அல்லது குறிப்பிட்ட ஆடைகளை அணிதல் போன்ற காரணங்களுக்காக மாத்திரம் எவருக்கும் எதிராகக் குற்றச்சாட்டுகளை முன்வைக்க முடியாது என்பதை அவர் மீண்டும் வலியுறுத்தினார்.

இந்நிலையில், குறித்த சட்டமூலம் தற்போது நாடாளுமன்றத்தின் முதலாம் வாசிப்பு நிலையிலேயே உள்ளது.

இதற்கிடையில், பொலிஸாரால் பதிவு செய்யப்படும் வாக்குமூலங்களைச் சான்றாகப் பயன்படுத்துவது மற்றும் பிணை வழங்குவதற்கான கட்டுப்பாடுகள் தொடர்பான சில ஏற்பாடுகள் குறித்து சட்டத்துறை நிபுணர்கள் தனியான கவலைகளை வெளியிட்டுள்ளமை குறிப்பிடத்தக்கது.