கொலன்னாவ வெள்ளக் கட்டுப்பாட்டுத் திட்டத்தை நிறைவு செய்ய ரூ. 15.07 பில்லியன் ஒதுக்கீட்டுக்கு அமைச்சரவை அனுமதி

கொலன்னாவ மழைநீர் வடிகால் மற்றும் சுற்றுச்சூழல் மேம்பாட்டுத் திட்டத்தின் எஞ்சிய பணிகளை மீண்டும் ஆரம்பித்து நிறைவு செய்வதற்காக, 15,077.82 மில்லியன் ரூபாய் செலவிலான திருத்தப்பட்ட மூன்றாண்டுத் திட்டத்திற்கு அமைச்சரவை அனுமதி வழங்கியுள்ளது.

கடந்த 2019ஆம் ஆண்டு ஆரம்பிக்கப்பட்ட இத்திட்டம், 2020ஆம் ஆண்டு கொவிட்-19 பெருந்தொற்று மற்றும் அதனைத் தொடர்ந்து ஏற்பட்ட பொருளாதார நெருக்கடி காரணமாகப் பெரும் தாமதங்களைச் சந்தித்தது.

இந்நிலையில், எஞ்சிய பணிகளை நிறைவு செய்வதற்கான புதிய திட்டம் மற்றும் திருத்தப்பட்ட செலவீட்டுக் கட்டமைப்பை போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் அமைச்சரவையில் சமர்ப்பித்ததைத் தொடர்ந்து இந்த அனுமதி வழங்கப்பட்டுள்ளது.

திருத்தப்பட்ட திட்டத்தின் கீழ், 3,250 மீற்றர் நீளமான சலலிஹினி மாவத்தை கால்வாயின் பணிகளை நிறைவு செய்தல் மற்றும் 3,868 மீற்றர் நீளமான தஹம்வல கால்வாயை நிர்மாணித்தல் உள்ளிட்ட முக்கிய உட்கட்டமைப்புப் பணிகள் முன்னெடுக்கப்படவுள்ளன.

மேலும், அதிக மழைவீழ்ச்சியின்போது தேங்கும் நீரைச் சீராகக் கையாளும் நோக்கில், நீரைத் தேக்கி வைப்பதற்கான குளங்கள் மற்றும் சேமிப்புப் பகுதிகளும் அமைக்கப்படவுள்ளன.

இதற்கமைய, 4,475 மீற்றர் நீளமான பஸ்ஸியான கால்வாய் மற்றும் 650 மீற்றர் நீளமான தண்டுகொடுவ கால்வாய் ஆகியவற்றின் சீரமைப்புப் பணிகளும் முன்னெடுக்கப்படும். அத்துடன், தண்டுதொட்ட வெள்ளக் கட்டுப்பாட்டுக் கதவு புனரமைக்கப்படுவதுடன், ஒரு விநாடிக்கு ஒரு கனமீற்றர் மழைநீரை வெளியேற்றும் திறன் கொண்ட மூன்று நடமாடும் நீரிறைக்கும் இயந்திரங்களும் பயன்படுத்தப்படவுள்ளன.

இத்திட்டத்தை நடைமுறைப்படுத்துவதற்காகத் தேவையான காணி சுவீகரிப்பு மற்றும் அதனால் மக்களின் வாழ்வாதாரங்களுக்கு ஏற்படக்கூடிய பாதிப்புகளைக் கருத்திற்கொண்டு, பாதிக்கப்படும் குடும்பங்களுக்கு நிவாரணம் வழங்குவதற்காக 1,015 மில்லியன் ரூபாய் ஒதுக்கப்பட்டுள்ளது.

இந்தத் திருத்தப்பட்ட திட்டத்தின் ஊடாக, கொலன்னாவ பிரதேசத்தில் வெள்ளப்பெருக்கு அபாயத்தைக் குறைத்து, மழைநீர் வடிகால் கட்டமைப்பை மேம்படுத்துவதுடன், அப்பகுதி மக்களின் பாதுகாப்பையும் சுற்றுச்சூழல் நிலையையும் மேம்படுத்த எதிர்பார்க்கப்படுகிறது.