ஜப்பானில் 100 வயதைத் தாண்டியோர் எண்ணிக்கை ஒரு லட்சத்தைக் கடந்து புதிய சாதனை!

நீண்ட ஆயுளுக்குப் பெயர்போன ஜப்பானில், நூறு வயது அல்லது அதற்கு மேற்பட்டோரின் எண்ணிக்கை வரலாற்றில் முதன்முறையாக ஒரு லட்சத்தைத் தாண்டியுள்ளது. இதன் மூலம் அந்நாடு புதிய சாதனைப் படைத்துள்ளது.

செப்டம்பர் 1-ஆம் நாளின் நிலவரப்படி, ஜப்பானில் நூறு வயது அல்லது அதற்கு மேற்பட்டோரின் பதிவு செய்யப்பட்ட எண்ணிக்கை 1,07,677 ஆக உயர்ந்துள்ளதாக ஜப்பான் நாட்டின் சுகாதார, தொழிலாளர் மற்றும் நலத்துறை அமைச்சகம் அறிவித்துள்ளது. இது முந்தைய ஆண்டைக் காட்டிலும் 7,914 அதிகமாகும். மேலும், இந்த எண்ணிக்கை தொடர்ந்து 56-வது ஆண்டாக புதிய உச்சத்தைத் தொட்டுள்ளது.

பெண்களின் ஆதிக்கம்

ஜப்பானிலுள்ள நூறு வயதைக் கடந்தவர்களில் பெரும்பான்மையானவர்கள் பெண்களாவர்.

மொத்தம் உள்ளவர்களில் 94,298 பேர் பெண்கள் ஆவர். இது ஒட்டுமொத்த எண்ணிக்கையில் 87.6% ஆகும்.

வரலாற்றுப் பின்னணி

ஜப்பான் அரசாங்கம் இந்தத் புள்ளிவிவரங்களை முதன்முதலில் தொகுக்கத் தொடங்கிய 1963-ஆம் ஆண்டில், நூறு வயது கடந்தவர்களின் எண்ணிக்கை வெறும் 153 ஆக மட்டுமே இருந்தது. அதன் பின்னர் இந்த வளர்ச்சி வியத்தகு வகையில் உயர்ந்துள்ளது:

1981: 1,000-ஐத் தாண்டியது

1998: 10,000-ஐத் தாண்டியது

2012: 50,000-ஐத் தாண்டியது

தற்போது ஜப்பானின் ஒவ்வொரு 1 லட்சத்திற்கும் உள்ள மக்களில் 87.51 பேர் நூறு வயது கடந்தவர்களாக உள்ளனர். இதில் சிமானே மாகாணம் (Shimane Prefecture) ஒரு லட்சத்திற்கு 186.65 பேர் என்ற விகிதத்தில் நாட்டிலேயே முதல் இடத்தில் உள்ளது.

நாட்டின் மூத்த குடிமக்கள்

கியோட்டோ நகைச் சேர்ந்த 114 வயதுடைய புயோ கிஷிமோட்டோ நாட்டின் மூத்த பெண்ணாக உள்ளார்.

குமாமொட்டோ நகைச் சேர்ந்த 112 வயதுடைய ஹிகாரு கட்டோ நாட்டின் மூத்த ஆணாகத் திகழ்கிறார்.

அரசின் கருத்து மற்றும் எதிர்கால சவால்கள்

இந்த மைல்கல்லை வரவேற்றுள்ள சுகாதாரத்துறை அமைச்சர் கெனிச்சிரோ உவேனோ , அதிகமான மக்கள் நீண்ட காலத்திற்குச் சுறுசுறுப்புடன் வாழ்வது ஊக்கமளிப்பதாகக் குறிப்பிட்டார். அதேவேளையில், ஆரோக்கியமான நீண்ட ஆயுளின் அவசியத்தையும் அவர் வலியுறுத்தினார்.

அதேவேளையில், இந்த சாதனை நிகழ்வானது ஜப்பான் தற்போது எதிர்கொண்டுள்ள கடுமையான சவால்களையும் வெளிச்சம் போட்டுக் காட்டுகிறது. குறைந்த பிறப்பு விகிதம் மற்றும் வேகமாக மூப்படைந்துவரும் சமுதாயம் காரணமாக, நாட்டின் தொழிலாளர் வர்க்கம் மற்றும் சமூகப் பாதுகாப்பு முறைமை ஆகியவற்றின் மீது அதிகரித்து வரும் அழுத்தம் தொடர்கிறது.