டொனால்ட் ட்ரம்பின் சிறுவயது வீடு 1.93 மில்லியன் டொலருக்கு விற்பனை!

அமெரிக்க ஜனாதிபதி டொனால்ட் ட்ரம்ப் தனது சிறுவயதில் வசித்த, நியூயோர்க் நகரில் அமைந்துள்ள வரலாற்றுச் சிறப்புமிக்க இல்லம் 2 மில்லியன் டொலருக்கும் குறைவான விலைக்கு விற்பனை செய்யப்பட்டுள்ளது.

அசோசியேட்டட் பிரஸ் மற்றும் நியூயோர்க் போஸ்ட் உள்ளிட்ட ஊடகங்கள் வெளியிட்டுள்ள செய்தி அறிக்கைகளின்படி, குவீன்ஸ் பகுதியில் அமைந்துள்ள இந்த வீடு 1.93 மில்லியன் டொலருக்குக் கைமாறியுள்ளது.

வரலாற்றுப் பின்னணியும் கட்டிடக்கலையும்

நியூயோர்க்கின் குவீன்ஸ் பகுதியில் உள்ள ஜமைக்கா எஸ்டேட்ஸ் பகுதியில் அமைந்துள்ள இந்த டியூடார் பாணியிலான ஆடம்பர இல்லத்தை, 1940ஆம் ஆண்டில் டொனால்ட் ட்ரம்பின் தந்தையும் பிரபல நில உடமை வணிகருமான ஃபிரெட் ட்ரம்ப் கட்டியெழுப்பினார். டொனால்ட் ட்ரம்ப் தனது வாழ்நாளின் முதல் நான்கு ஆண்டுகள் வரை இந்த வீட்டில்தான் வசித்து வந்தார்.

இதற்கு முன்னர், டரம்ப் முதன்முதலில் அமெரிக்காவின் ஜனாதிபதியாகத் பதவியேற்ற காலப்பகுதியில், அதாவது 2017ஆம் ஆண்டில் இவ்வ வீடு 2.14 மில்லியன் டொலருக்கு விற்பனை செய்யப்பட்டிருந்தது. அதனைத் தொடர்ந்து, சுற்றுலாப் பயணிகளை ஈர்க்கும் வகையிலான ஏர்பிபி வாடகை இல்லமாகவும் இது சிறிது காலம் செயற்பட்டது.

பாழடைந்த நிலையில் இருந்து பிரம்மாண்ட மறுசீரமைப்பு

கடந்த ஆண்டு, டாமி லின் என்ற நில உடமை மேம்பாட்டாளர் ஐந்து படுக்கையறைகள் மற்றும் மூன்று குளியலறைகளைக் கொண்ட இந்த வீட்டை வெறும் 835,000 டொலருக்கு வாங்கினார். எனினும், அதற்கு முன்னர் பல ஆண்டுகளாகப் பராமரிப்பின்றி இந்த இல்லம் வெறிச்சோடிக்கிடந்துள்ளது.

இதுகுறித்து 'தி வால் ஸ்ட்ரீட் ஜர்னல்' பத்திரிகைக்குப் பேட்டியளித்த லின், வீட்டின் மோசமான நிலை குறித்து விளக்கியிருந்தார்:

"இந்த வீட்டில் மின்சாரமோ அல்லது நீர்த் தேவையோ பூர்த்தி செய்யப்படவில்லை. அடித்தளத்தில் நீர்க்குழாய் வெடித்துச் சேதமடைந்திருந்ததுடன், கூரை முழுவதும் பூஞ்சை படர்ந்திருந்தது. மனிதர்கள் எவரும் வசிக்க முடியாதவாறே இந்த இல்லம் காணப்பட்டது" என்றார் அவர்.

நவீன வசதிகளுடன் கூடிய புதுப்பிப்பு

இதனையடுத்து, சுமார் எட்டு மாத காலப்பகுதிக்குள் 500,000 டொலர் செலவிட்டு இந்த வீட்டை லின் முற்றிலுமாகப் புதுப்பித்துள்ளார்.

புதுப்பிக்கப்பட்ட இந்த இல்லத்தில், சமையற்கலை நிபுணர்களுக்கான நவீன சமையலறை , ஹெரிங்போன் வகைத் மரத் தளங்கள் மற்றும் ஸ்பா (Spa) போன்ற பிரம்மாண்டமான குளியலறைகள் உள்ளிட்ட பல்வேறு அதிநவீன வசதிகள் சேர்க்கப்பட்டுள்ளன.

இந்நிலையில், கடந்த ஜூலை மாதத்தில் பெயர் வெளியிடப்படாத ஒரு கொள்வனவு வாடிக்கையாளருடன் ஏற்பட்ட ஒப்பந்தத்தின் ஊடாக, இந்த விற்பனை நடவடிக்கைகள் நிறைவுக்கு வந்துள்ளமை குறிப்பிடத்தக்கது.