களுத்துறையில் சொகுசுப் பேருந்தை வழிமறித்து தாக்குதல் – ஆறு பேர் கைது!
களுத்துறை – கொழும்பு பிரதான வீதியில், நாகஸ் சந்திக்கு அருகில் சொகுசுப் பேருந்தொன்றை வழிமறித்து அதன் சாரதி மற்றும் நடத்துநர் மீது தாக்குதல் நடத்தியதாகக் கூறப்படும் ஆறு சந்தேகநபர்கள் பொலிஸாரால் கைது செய்யப்பட்டுள்ளனர்.
மோட்டார் சைக்கிள்களில் பயணித்த சந்தேகநபர்கள், குறித்த பேருந்தை வழிமறித்த பின்னர் அதன் சாரதி மற்றும் நடத்துநர் மீது உடல் ரீதியான தாக்குதலை மேற்கொண்டுள்ளதாகப் பொலிஸார் தெரிவித்துள்ளனர்.
இந்தச் சம்பவத்துடன் தொடர்புடையவை எனச் சந்தேகிக்கப்படும் இரண்டு மோட்டார் சைக்கிள்களையும் களுத்துறை வடக்கு பொலிஸார் கைப்பற்றியுள்ளனர்.
கைது செய்யப்பட்ட சந்தேகநபர்கள் வாதுவை மற்றும் மொரொந்துடுவை ஆகிய பகுதிகளைச் சேர்ந்தவர்கள் எனத் தெரிவிக்கப்படுகிறது.
சந்தேகநபர்களைக் களுத்துறை நீதவான் நீதிமன்றத்தில் முன்னிலைப்படுத்த நடவடிக்கை எடுக்கப்பட்டுள்ளதுடன், சம்பவம் தொடர்பான மேலதிக விசாரணைகளை களுத்துறை வடக்கு பொலிஸார் முன்னெடுத்து வருகின்றனர்.
