சர்வதேச வெற்றிகளை இலக்காகக் கொண்டு விளையாட்டுத்துறையை மேம்படுத்தத் திட்டம் – ஜனாதிபதி அறிவிப்பு!

இலங்கை விளையாட்டு வீரர்கள் சர்வதேச அளவில் சாதனைகளைப் படைக்கும் வகையிலும், நாடு முழுவதும் ஆரோக்கியமான சமூகத்தையும் வலுவான விளையாட்டுக் கலாசாரத்தையும் உருவாக்கும் வகையிலும் மூலோபாயத் திட்டங்களைத் தயாரிக்குமாறு விளையாட்டுத்துறை அமைச்சின் அதிகாரிகளுக்கு ஜனாதிபதி அநுரகுமார திசாநாயக்க பணிப்புரை விடுத்துள்ளார்.

இளைஞர் விவகாரங்கள் மற்றும் விளையாட்டுத்துறை அமைச்சின் 2027ஆம் ஆண்டுக்கான வரவு செலவுத் திட்ட முன்மொழிவுகள் தொடர்பாக, ஒக்டோபர் 29ஆம் திகதி காலை ஜனாதிபதி செயலகத்தில் நடைபெற்ற கலந்துரையாடலின்போதே ஜனாதிபதி இந்த அறிவுறுத்தல்களை வழங்கியுள்ளார்.

தொற்றா நோய்கள் தற்போது சுகாதாரத்துறையில் எதிர்கொள்ளப்படும் முக்கிய சவாலாக மாறியுள்ளதைச் சுட்டிக்காட்டிய ஜனாதிபதி, இப்பிரச்சினைக்குத் தீர்வு காண்பதில் விளையாட்டும் உடற்பயிற்சியும் முக்கிய பங்கு வகிப்பதாகத் தெரிவித்தார்.

இதற்காக, பொதுமக்கள் மத்தியில் சுறுசுறுப்பான மற்றும் ஆரோக்கியமான வாழ்க்கை முறையை ஊக்குவிக்கும் வகையில் மனப்பாங்கு மாற்றங்களை ஏற்படுத்த வேண்டியதன் அவசியத்தையும் அவர் வலியுறுத்தினார்.

நாடு முழுவதும் நடைபாதைகள் அமைக்கப்பட்டுள்ள போதிலும், சில பகுதிகளில் அவை எதிர்பார்த்த அளவுக்குப் பயன்படுத்தப்படுவதில்லை எனவும் ஜனாதிபதி சுட்டிக்காட்டினார். எனவே, பொதுமக்கள் நடைபாதைகளைப் பயன்படுத்துவதை ஊக்குவிப்பதற்குப் புதிய வேலைத்திட்டங்களை முன்னெடுக்க வேண்டுமெனவும் அவர் அறிவுறுத்தினார்.

இத்தகைய திட்டங்களை முறையாகத் திட்டமிட்டு நடைமுறைப்படுத்துவதற்காக, நாட்டிலுள்ள விளையாட்டு மைதானங்கள், நடைபாதைகள் மற்றும் உள்ளக விளையாட்டு அரங்குகள் தொடர்பான துல்லியமானதும் புதுப்பிக்கப்பட்டதுமான தரவுத்தளத்தைப் பேணுவதன் முக்கியத்துவத்தையும் ஜனாதிபதி வலியுறுத்தினார்.

இதன்போது, 2027ஆம் ஆண்டில் நடைமுறைப்படுத்துவதற்குத் திட்டமிடப்பட்டுள்ள பல்வேறு உட்கட்டமைப்பு மற்றும் அபிவிருத்தித் திட்டங்கள் குறித்தும் கலந்துரையாடப்பட்டது.

இதன் முக்கிய முன்மொழிவுகளாக, இலங்கை விளையாட்டு வீரர்களின் திறன்களை சர்வதேச தரத்திற்கு உயர்த்துவதற்காக தேசிய உயர் செயல்திறன் மையமொன்றை (National High-Performance Centre) நிறுவுதல், அனுராதபுரத்தில் 400 மீற்றர் செயற்கை ஓடுபாதையொன்றை அமைத்தல் ஆகியவை முன்வைக்கப்பட்டன.

மேலும், தியகம சர்வதேச விளையாட்டு அரங்கில் காணப்படும் குறைபாடுகளை நிவர்த்தி செய்து அதனை மேம்படுத்துதல், சுகததாச உள்ளக விளையாட்டு அரங்கை நவீனமயப்படுத்துதல் மற்றும் விளையாட்டு மருத்துவ நிறுவனங்கள், பல்கலைக்கழகங்கள் இணைந்து விளையாட்டு மற்றும் உடற்பயிற்சி தொடர்பான ஆய்வுகளை முன்னெடுத்தல் ஆகிய திட்டங்களும் ஆராயப்பட்டன.

இதற்கு மேலதிகமாக, தேசிய இளைஞர் சேவைகள் மன்றம் மற்றும் தேசிய இளைஞர் படையணி ஆகியவற்றினால் முன்னெடுக்கப்படும் வேலைத்திட்டங்களின் தற்போதைய முன்னேற்றம் மற்றும் எதிர்காலத் திட்டங்கள் குறித்தும் இக்கலந்துரையாடலில் மீளாய்வு செய்யப்பட்டது.