வங்காள விரிகுடா ஆழ்கடல் பகுதிகளுக்கு அம்பர் எச்சரிக்கை!
வங்காள விரிகுடாவின் ஆழ்கடல் பகுதிகளில் பலத்த காற்று வீசுவதுடன், கடல் கொந்தளிப்பாகக் காணப்படும் என இலங்கை வளிமண்டலவியல் திணைக்களம் அம்பர் நிற எச்சரிக்கையை விடுத்துள்ளது.
இதனால், பல நாள் கடற்றொழிலில் ஈடுபடும் படகுகளின் உரிமையாளர்கள், மீனவர்கள் மற்றும் கடற்படையினர் அவதானத்துடன் செயற்படுமாறு அறிவுறுத்தப்பட்டுள்ளனர்.
வடக்கு சுமத்ரா தீவுகளுக்கு அருகில் நிலவிய வளிமண்டலத் தாழ்வுநிலை, இன்று (29) முற்பகல் 11.30 மணியளவில் தாழமுக்கமாக உருவெடுத்துள்ளதாக வளிமண்டலவியல் திணைக்களத்தின் இயற்கை அனர்த்தங்கள் தொடர்பான முன்னெச்சரிக்கை நிலையம் தெரிவித்துள்ளது.
இது தொடர்பான வானிலை ஆலோசனை இன்று பிற்பகல் 4.30 மணிக்கு வெளியிடப்பட்டுள்ளது.
இந்தத் தாழமுக்கம் மேற்கு - வடமேற்குத் திசையில் நகர்ந்து, எதிர்வரும் ஒக்டோபர் 31ஆம் திகதியளவில் தென்கிழக்கு வங்காள விரிகுடா மற்றும் அந்தமான் - நிக்கோபார் தீவுகளை அண்மித்த பகுதிகளில் காற்றழுத்தத் தாழ்வு மண்டலமாக வலுப்பெறுமென எதிர்பார்க்கப்படுகிறது.
தொடர்ந்து மேற்கு - வடமேற்குத் திசையில் நகரும் இந்த வானிலைத் தொகுதி, அடுத்துவரும் இரண்டு நாட்களில் மேலும் வலுப்பெற்று இந்தியாவின் ஆந்திரப் பிரதேசக் கரையை நோக்கி நகரக்கூடும் என வானிலை ஆய்வாளர்கள் எதிர்வுகூறியுள்ளனர்.
இதன் காரணமாக, எச்சரிக்கை விடுக்கப்பட்டுள்ள ஆழ்கடல் பகுதிகளில் காற்றின் வேகம் அவ்வப்போது மணிக்கு 55 கிலோமீற்றர் வரை அதிகரிக்கக்கூடும் எனவும், கடல் கொந்தளிப்பாகக் காணப்படும் எனவும் தெரிவிக்கப்பட்டுள்ளது.
எனவே, குறித்த கடற்பகுதிகளில் கடற்றொழில் மற்றும் கடற்படை நடவடிக்கைகளில் ஈடுபடுவோர் மிகுந்த அவதானத்துடன் செயற்படுவதுடன், வளிமண்டலவியல் திணைக்களத்தினால் வெளியிடப்படும் அடுத்தடுத்த வானிலை அறிவிப்புகள் மற்றும் முன்னறிவிப்புகளைத் தொடர்ந்து அவதானிக்குமாறும் அறிவுறுத்தப்பட்டுள்ளனர்.
