கடல்சார் பாதுகாப்பு நடவடிக்கைகள் மூலம் வருமானத்தை அதிகரிக்க பாதுகாப்பு அமைச்சு நடவடிக்கை

இலங்கை கடற்படையின் கப்பல்களிலுள்ள பாதுகாப்புக் குழுக்களுக்கு (Onboard Security Team – OBST) வழங்கப்படும் ஆதரவு சேவைகள் மூலம் கிடைக்கும் வருமானத்தை அதிகரிப்பதற்கும், அதன் செயற்பாட்டுத் திறனை மேம்படுத்துவதற்கும் பாதுகாப்பு அமைச்சு நடவடிக்கை எடுத்துள்ளது.

இது தொடர்பான விசேட கலந்துரையாடல், பாதுகாப்பு பிரதி அமைச்சர் அருண ஜயசேகர தலைமையில் நாடாளுமன்ற வளாகத்தில் நடைபெற்றது.

இதன்போது, குறித்த வேலைத்திட்டத்தின் செயற்பாட்டு முன்னேற்றம் மற்றும் நிதி நிலைமைகள் தொடர்பில் விரிவாக ஆராயப்பட்டதாக பாதுகாப்பு அமைச்சு தெரிவித்துள்ளது.

காலியில் அமைந்துள்ள பெட்டிகலாவத்தை ஆயுதக் களஞ்சியத் தொகுதிக்கு பாதுகாப்பு பிரதி அமைச்சர் அண்மையில் மேற்கொண்ட கண்காணிப்பு விஜயத்தின்போது அடையாளம் காணப்பட்ட குறைபாடுகள் தொடர்பிலும் இதன்போது கவனம் செலுத்தப்பட்டது.

வணிகக் கப்பல்களில் பாதுகாப்புப் பணிகளில் ஈடுபடும் வெளிநாட்டு தனியார் கடல்சார் பாதுகாப்பு நிறுவனங்களுக்குச் சொந்தமான ஆயுதங்கள் மற்றும் உபகரணங்கள் இந்தக் களஞ்சியத்தில் சேமித்து வைக்கப்படுகின்றன. இலங்கை கடற்படையின் ஆதரவுடன் இந்தச் சேவைகள் முன்னெடுக்கப்படுகின்றன.

குறித்த நடவடிக்கைகளில் காணப்படும் செயற்பாட்டுக் குறைபாடுகள், அவற்றைத் தீர்ப்பதற்கான நடவடிக்கைகள் மற்றும் கடல்சார் பாதுகாப்பு ஆதரவு சேவைகள் மூலம் வருமானத்தை அதிகரிப்பதற்கான சாத்தியக்கூறுகள் குறித்தும் கூட்டத்தில் ஆராயப்பட்டன.

இந்தச் சேவைகள் தொடர்ந்தும் தடையின்றியும் வினைத்திறனுடனும் முன்னெடுக்கப்படுவதை உறுதிப்படுத்துவதற்குத் தேவையான நடவடிக்கைகளை மேற்கொள்ளுமாறு பிரதி அமைச்சர் அதிகாரிகளுக்கு அறிவுறுத்தினார்.

அத்துடன், இச்செயற்பாடுகள் அனைத்திலும் வெளிப்படைத்தன்மை, பொறுப்புக்கூறல் மற்றும் முறையான நிதி முகாமைத்துவம் ஆகியவற்றைப் பேணுவதன் முக்கியத்துவத்தையும் அவர் வலியுறுத்தினார்.

இக்கலந்துரையாடலில் ஜனாதிபதியின் சட்ட விவகாரங்களுக்கான ஆலோசகர் ஜே.எம். விஜேபண்டார, பாதுகாப்புச் செயலாளர், கடற்படைத் தளபதி, ரக்னா அரக்ஷ லங்கா நிறுவனத்தின் தலைவர் உள்ளிட்ட பாதுகாப்பு அமைச்சு, இலங்கை கடற்படை மற்றும் ரக்னா அரக்ஷ லங்கா நிறுவனத்தின் சிரேஷ்ட அதிகாரிகள் கலந்துகொண்டனர்.