இலங்கையின் பல பகுதிகளில் மோசமடைந்த காற்றின் தரம் – யாழ்ப்பாணத்தில் அதிக பாதிப்பு!

இலங்கையின் பல பகுதிகளில் காற்றின் தரம் சுகாதாரத்திற்கு பாதிப்பை ஏற்படுத்தக்கூடிய அளவுக்குக் குறைந்துள்ளதாகத் தெரிவிக்கப்படுகிறது.

IQAir நிறுவனம் இன்று (30) காலை 10.30 மணியளவில் வெளியிட்ட நிகழ்நேர காற்றுத் தரக் குறியீட்டுத் தரவுகளின்படி, நாட்டின் பல பகுதிகளில் காற்று மாசடைந்துள்ளதுடன், குறிப்பாக உணர்திறன் அதிகமுள்ளவர்களுக்கு உடல்நலப் பாதிப்புகள் ஏற்படக்கூடிய நிலை காணப்படுகிறது.

இதன்படி, இலங்கையில் அதிக காற்று மாசடைந்த நகரமாக யாழ்ப்பாணம் பதிவாகியுள்ளது. அங்கு அமெரிக்க காற்றுத் தரக் குறியீடு (US AQI) 142 ஆகக் காணப்பட்டது.

அதேவேளை, புத்தளம் 119 என்ற காற்றுத் தரக் குறியீட்டுடனும், அனுராதபுரம் 115 என்ற குறியீட்டுடனும் அடுத்தடுத்த இடங்களைப் பெற்றுள்ளன.

கொழும்பில் காற்றுத் தரக் குறியீடு 102 ஆகப் பதிவாகியுள்ளதுடன், நாட்டில் அதிக காற்று மாசடைந்த நகரங்களின் பட்டியலில் கொழும்பு நான்காவது இடத்தைப் பிடித்துள்ளது.

அமெரிக்க காற்றுத் தரக் குறியீட்டு வகைப்பாட்டின்படி, 101 முதல் 150 வரையிலான பெறுமானங்கள், குழந்தைகள், முதியவர்கள் மற்றும் சுவாசம் அல்லது இதய நோய்களால் பாதிக்கப்பட்டவர்கள் உள்ளிட்ட உணர்திறன் அதிகமுள்ளவர்களின் உடல்நலத்திற்குப் பாதிப்பை ஏற்படுத்தக்கூடிய நிலையாகக் கருதப்படுகின்றன.

மேலும், நாட்டின் பல பகுதிகளிலும் காற்று மாசுபாட்டின் அளவு அதிகரித்துள்ளதாக காற்றுத் தர வரைபடம் சுட்டிக்காட்டியுள்ளது.

எனினும், வானிலை நிலைமைகள், காற்றின் திசை மற்றும் வேகம், அத்துடன் மாசுபாட்டின் அளவு ஆகியவற்றைப் பொறுத்து நாள் முழுவதும் காற்றின் தரத்தில் மாற்றங்கள் ஏற்படக்கூடும் எனத் தெரிவிக்கப்படுகிறது.