அமெரிக்காவில் நடுவானில் மோதிய இரு ஹெலிகொப்டர்கள்; மூவர் உயிரிழப்பு

அமெரிக்காவின் ஓரிகன் (Oregon) மாநிலத்தில் இரு ஹெலிகொப்டர்கள் நடுவானில் மோதிக் கொண்டதில் ஏற்பட்ட விபத்தில் மூவர் உயிரிழந்துள்ளனர்.

குறித்த விபத்து, கடந்த வியாழக்கிழமை பிற்பகல் சுமார் 2 மணியளவில், போர்ட்லேண்ட் நகருக்கு தென்மேற்கே அமைந்துள்ள மெக்மின்வில் (McMinnville) விமான நிலையத்திற்கு அருகில் இடம்பெற்றுள்ளது.

விபத்தின்போது, அனுபவம் வாய்ந்த விமானி ஒருவர் பராமரிப்புப் பணிகளுக்குப் பின்னரான சோதனைப் பறப்பில் ஈடுபட்டிருந்த ஹெலிகொப்டரும், விமானப் பயிற்றுவிப்பாளர் ஒருவரும் பிரித்தானியாவைச் சேர்ந்த பயிற்சி விமானி ஒருவரும் பயணித்த மற்றொரு ஹெலிகொப்டரும் நடுவானில் மோதியுள்ளன.

இதனையடுத்து, இரு ஹெலிகொப்டர்களும் கட்டுப்பாட்டை இழந்து அருகிலிருந்த விவசாய நிலத்தில் விழுந்து நொறுங்கியுள்ளன. இந்த விபத்தில் மூவரும் சம்பவ இடத்திலேயே உயிரிழந்துள்ளனர்.

உயிரிழந்தவர்கள் ஓரிகன் மாநிலத்தைச் சேர்ந்த 38 வயதான டைலர் ஸ்டர்டெவன்ட் (Tyler Sturdevant), டெக்சாஸ் மாநிலத்தைச் சேர்ந்த 22 வயதான மேடி ஆஸ்போ (Maddie Aasbo) மற்றும் பிரித்தானியாவைச் சேர்ந்த 31 வயதான கிறிஸ்டோபர் ஜோகின் (Christopher Joughin) என அடையாளம் காணப்பட்டுள்ளனர்.

இவர்களில் டைலர் ஸ்டர்டெவன்ட், 20 ஆண்டுகளுக்கும் மேலாக ஹெலிகொப்டர் விமானியாகப் பணியாற்றிய அனுபவம் கொண்டவர். அத்துடன், கடந்த நான்கு ஆண்டுகளாக அமெரிக்காவின் மத்திய விமானப் போக்குவரத்து நிர்வாகத்தின் (FAA) விமானி பரீட்சகராகவும் பணியாற்றி வந்துள்ளார்.

அதேவேளை, உயிரிழந்த மேடி ஆஸ்போ, ஹெலிகொப்டர் விமானப் பயிற்றுவிப்பாளராகப் பணியாற்றி வந்ததுடன், வனவிலங்கு முகாமைத்துவத் துறையிலும் கல்வி கற்றவர். அவரது மறைவுக்கு முன்னாள் கல்வி நிறுவனத்தினரும் சகாக்களும் இரங்கல் தெரிவித்துள்ளனர்.

விபத்து இடம்பெற்றபோது அருகிலுள்ள திராட்சைத் தோட்டத்தில் பணியாற்றிக் கொண்டிருந்த ஒருவர், இரு ஹெலிகொப்டர்களும் நடுவானில் மோதியபோது வெடிப்புச் சத்தம் கேட்டதாகத் தெரிவித்துள்ளார். மோதலைத் தொடர்ந்து ஒரு ஹெலிகொப்டரின் வால் பகுதி சேதமடைந்து அது சுழன்றபடி கீழே விழுந்ததாகவும், மற்றைய ஹெலிகொப்டர் நேரடியாக நிலத்தை நோக்கி வீழ்ந்ததாகவும் அவர் குறிப்பிட்டுள்ளார்.

விபத்தில் சிக்கிய சிறிய ரக Robinson R22 ஹெலிகொப்டர் விமானப் பயிற்சிப் பயணத்தில் ஈடுபட்டிருந்ததாகவும், Airbus AS350B3 ரக ஹெலிகொப்டர் பராமரிப்புப் பணிகளுக்குப் பின்னரான சோதனைப் பயணத்தில் ஈடுபட்டிருந்ததாகவும் அமெரிக்க தேசிய போக்குவரத்து பாதுகாப்புச் சபை (NTSB) தெரிவித்துள்ளது.

விபத்து தொடர்பான விசாரணைகளை முன்னெடுப்பதற்காக NTSB அதிகாரிகள் சம்பவ இடத்திற்குச் சென்றுள்ளதுடன், விபத்துக்கான காரணம் குறித்து ஆய்வு மேற்கொள்ளப்படவுள்ளது.

இதற்கிடையில், விபத்தில் உயிரிழந்தவர்களுக்குச் சொந்தமான இரு ஹெலிகொப்டர்களின் நிறுவனங்களும் விசாரணைகளுக்கு முழுமையான ஒத்துழைப்பு வழங்குவதாக அறிவித்துள்ளன.

மேலும், உயிரிழந்த பிரித்தானியப் பிரஜையான கிறிஸ்டோபர் ஜோகினின் குடும்பத்தினருக்கு உதவி வழங்கி வருவதாக பிரித்தானிய வெளிநாட்டு, பொதுநலவாய மற்றும் அபிவிருத்தி அலுவலகம் தெரிவித்துள்ளது.