அநுராதபுரத்தில் மூன்று பேருந்துகள் மோதி கோர விபத்து – ஐவர் உயிரிழப்பு, சுமார் 20 பேர் காயம்

அநுராதபுரம், ரம்பேவ பகுதியில் ஏ9 வீதியில் இன்று (10) காலை இடம்பெற்ற மூன்று பேருந்துகள் ஒன்றுடன் ஒன்று மோதிய கோர விபத்தில் ஐந்து பேர் உயிரிழந்துள்ளதுடன், சுமார் 20 பேர் காயமடைந்துள்ளனர்.

காலை சுமார் 10.30 மணியளவில் இலங்கை போக்குவரத்துச் சபைக்குச் சொந்தமான இரண்டு பேருந்துகள் நேருக்கு நேர் மோதியதில் இந்த விபத்து இடம்பெற்றுள்ளதாக பொலிஸ் ஊடகப் பேச்சாளர் உதவிப் பொலிஸ் அத்தியட்சகர் எப்.யூ. வூட்லர் தெரிவித்துள்ளார்.

இதன்போது, அவற்றில் ஒரு பேருந்தின் பின்னால் பயணித்த தனியார் பேருந்து, குறித்த பேருந்தின் பின்புறத்தில் மோதியதாகவும் அவர் குறிப்பிட்டுள்ளார்.

இந்த விபத்தில் ஐந்து பேர் உயிரிழந்துள்ளமை உறுதிப்படுத்தப்பட்டுள்ளதாக மிஹிந்தலை பொலிஸ் நிலையப் பொறுப்பதிகாரி தெரிவித்துள்ளார்.

மேலும், காயமடைந்த 18 முதல் 20 பேர் வரையானோர் அநுராதபுரம், வவுனியா மற்றும் மெதவச்சி ஆகிய வைத்தியசாலைகளில் அனுமதிக்கப்பட்டுள்ளனர்.

விபத்து தொடர்பான விசாரணைகளை முன்னெடுப்பதற்காக இரண்டு பொலிஸ் குழுக்கள் பணியில் ஈடுபடுத்தப்பட்டுள்ளதாக பொலிஸ் ஊடகப் பேச்சாளர் தெரிவித்துள்ளார்.

விபத்துக்கான காரணம் மற்றும் சம்பவத்தின் பின்னணி தொடர்பில் பொலிஸார் மேலதிக விசாரணைகளை முன்னெடுத்து வருகின்றனர்.