அஜித்தின் ‘டேர் டெவில்’ படத்தில் இணையும் நடிகர் பார்த்திபன்!

நடிகர் அஜித் குமார் நடிப்பில் உருவாகவுள்ள ‘டேர் டெவில்’ திரைப்படத்தில் தான் நடிக்க இருப்பதை நடிகர் பார்த்திபன் உறுதிப்படுத்தியுள்ளார்.

நீண்ட நாட்களாக கார் பந்தயத்தில் கவனம் செலுத்தி வந்த நடிகர் அஜித் குமார், அடுத்ததாக ‘குட் பேட் அக்லி’ படத்தின் இயக்குநர் ஆதிக் ரவிச்சந்திரனுடன் மீண்டும் இணைந்து ‘டேர் டெவில்’ என்ற திரைப்படத்தில் நடிக்கவுள்ளார்.

பிரேவ்ஹார்ட் (Braveheart) தயாரிப்பு நிறுவனத்தின் கீழ் அஜித்தின் மனைவி ஷாலினி தயாரிக்கும் இந்தப் படத்தின் படப்பிடிப்புப் பணிகள் இன்று (நவம்பர் 2) தொடங்கவுள்ளதாக ஏற்கனவே தகவல்கள் வெளியாகியிருந்தன.

இந்நிலையில், இப்படத்தில் தான் நடிப்பதை நடிகர் பார்த்திபன் தனது எக்ஸ் (X) தளப் பதிவு மூலம் உறுதிப்படுத்தியுள்ளார்.

அதில், “இன்று டேர் டெவில் நாள். சிறந்தவரான அஜித் குமாருடன் இணைந்து நடிப்பதிலும், இயக்குநர் ஆதிக் ரவிச்சந்திரனுடன் பணியாற்றுவதிலும் மிகவும் மகிழ்ச்சியடைகிறேன்” என அவர் குறிப்பிட்டுள்ளார்.

இதனிடையே, இயக்குநர் ஆதிக் ரவிச்சந்திரன் அண்மையில் அளித்த பேட்டி ஒன்றில், ‘டேர் டெவில்’ திரைப்படத்தில் அஜித் குமாருடன் ஸ்ரீலீலா, பிரபு, பார்த்திபன், சுனில் உள்ளிட்டோர் முக்கிய கதாபாத்திரங்களில் நடிக்கவுள்ளதாகத் தெரிவித்திருந்தார்.

இத்திரைப்படத்துக்கு அனிருத் இசையமைக்கிறார். அபிநந்தன் ராமானுஜம் ஒளிப்பதிவுப் பணிகளையும், விஜய் வேலுகுட்டி படத்தொகுப்புப் பணிகளையும் மேற்கொள்கின்றனர்.