விநாயகர் சதுர்த்தி: மகாராஷ்டிராவில் கிலோ 27 ஆயிரம் ரூபாய்க்கு விற்கப்படும் தங்க மோதகம்!
விநாயகர் சதுர்த்தி பெருவிழாவை முன்னிட்டு, மகாராஷ்டிர மாநிலம் நாசிக்கில் உள்ள பிரபல இனிப்பகமான ‘சாகர் ஸ்வீட்ஸ்’ (Sagar Sweets), கிலோ 27 ஆயிரம் ரூபாய் மதிப்பிலான சிறப்பு ‘தங்க மோதகம்’ இனிப்பை விற்பனைக்கு அறிமுகப்படுத்தியுள்ளது.
ஆண்டுதோறும் விநாயகர் சதுர்த்தியை ஒட்டிப் புதுமையான இனிப்புகளைத் தயாரித்து வாடிக்கையாளர்களின் கவனத்தை ஈர்ப்பதை வழக்கமாகக் கொண்டுள்ள இந்த இனிப்பகம், இந்த ஆண்டும் உணவுக்குப் பயன்படுத்தக்கூடிய தூய தங்கத் தகடு சுற்றப்பட்ட பிரத்யேக மோதகங்களைச் சந்தைப்படுத்தியுள்ளது. தற்போது சமூக வலைத்தளங்களில் இந்தத் தங்க மோதகம் தொடர்பான காணொளிகள் பரவலாகப் பகிரப்பட்டு வருகின்றன.
இதே இனிப்பகத்தில் கடந்த 2021-ஆம் ஆண்டு ஒரு கிலோ தங்க மோதகம் 12 ஆயிரம் ரூபாய்க்கும், கடந்த ஆண்டு (2025) 20 ஆயிரம் ரூபாய்க்கும் விற்பனை செய்யப்பட்டது. தங்கத்தின் சந்தை விலை உயர்ந்து வருவதைத் தொடர்ந்து, கடந்த ஐந்து ஆண்டுகளில் இந்த தங்க மோதகத்தின் விலையும் இரு மடங்குக்கும் அதிகமாக அதிகரித்துள்ளதாகக் கடை உரிமையாளர்கள் தெரிவிக்கின்றனர்.
மேலும், தங்க மோதகம் மட்டுமன்றி, வெள்ளித் தகடு சுற்றப்பட்ட ‘வெள்ளி மோதகங்களையும்’ குறைந்த விலையில் பொதுமக்கள் வாங்குவதற்காக இந்த இனிப்பகம் விற்பனைக்கு வைத்துள்ளமை குறிப்பிடத்தக்கது.
