அநுராதபுர புனித நகர அபிவிருத்தி: குடியிருப்பாளர்கள் வெளியேற்றப்படமாட்டார்கள் – பௌத்த பிக்கு உறுதி
அநுராதபுர புனித நகர அபிவிருத்தித் திட்டத்தின் கீழ், அப்பகுதியில் வசிக்கும் பொதுமக்கள் எவரும் வெளியேற்றப்படுவதற்கான திட்டம் இல்லை என அட்டமஸ்தானத்தின் பதில் தலைவர் மற்றும் ருவன்வெலிசாய விகாரையின் பிரதம விகாராதிபதி வண. ஈத்தலவெட்டுனுவே ஞானதிலக்க தேரர் தெரிவித்துள்ளார்.
பௌத்த சாசன அமைச்சில் திங்கட்கிழமை (16) நடைபெற்ற ஊடகவியலாளர் சந்திப்பில் கருத்துத் தெரிவித்த அவர், முன்மொழியப்பட்டுள்ள அபிவிருத்தித் திட்டத்திற்கு பொதுமக்கள் இடையூறு விளைவிக்காமல், அதற்கு ஒத்துழைப்பு வழங்க வேண்டும் எனக் கேட்டுக்கொண்டார்.
அபிவிருத்தித் திட்டத்தின் சில அம்சங்கள் தொடர்பில் பொதுமக்களுக்கு போதிய தெளிவுபடுத்தல்கள் வழங்கப்படாமையே பல்வேறு சந்தேகங்களும் அச்சங்களும் உருவாகக் காரணமாக அமைந்துள்ளதாகவும் அவர் குறிப்பிட்டார்.
புனிதப் பிரதேசத்தைச் சுற்றி வேலி அமைப்பதற்கான முன்மொழிவு தொடர்பில் விளக்கமளித்த தேரர், தொல்பொருள் சின்னங்கள் கால்நடைகளால் சேதப்படுத்தப்படுதல், சட்டவிரோத கட்டுமானங்கள் மற்றும் தொல்பொருள் முக்கியத்துவம் வாய்ந்த இடங்களில் வாகனங்கள் நிறுத்தப்படுதல் போன்றவற்றைத் தடுப்பதே இதன் நோக்கமாக இருந்ததாகத் தெரிவித்தார்.
எனினும், வேலி அமைக்கும் முன்மொழிவு தற்போது கைவிடப்பட்டுள்ளதாகவும் அவர் உறுதிப்படுத்தினார்.
அதேவேளை, புனித நகரப் பிரதேசத்தை 28 சதுர கிலோமீற்றரிலிருந்து 38 சதுர கிலோமீற்றராக விரிவுபடுத்துவது தொடர்பில் எழுந்துள்ள கவலைகளுக்கும் அவர் விளக்கமளித்தார்.
மத வழிபாட்டு நிகழ்வுகள் மற்றும் திருவிழாக் காலங்களில் அநுராதபுரத்திற்கு வருகை தரும் பெருமளவிலான பக்தர்களை முறையாக நிர்வகிக்க வேண்டிய தேவையும் இந்த அபிவிருத்தித் திட்டத்தில் கவனத்தில் கொள்ளப்பட்டுள்ளதாக அவர் தெரிவித்தார்.
புனித நகரப் பகுதியில் வசிக்கும் மக்களை வெளியேற்றும் நோக்கம் எவ்விதத்திலும் கிடையாது என்பதை மீண்டும் வலியுறுத்திய அவர், அநுராதபுரத்தின் மத மற்றும் தொல்பொருள் மரபுரிமைகளை எதிர்கால சந்ததியினருக்காகப் பாதுகாப்பதற்கான நடவடிக்கைகளுக்கு பொதுமக்கள் ஆதரவளிக்க வேண்டும் எனவும் கேட்டுக்கொண்டார்.
அநுராதபுர புனித நகர அபிவிருத்தி தொடர்பாக, பதில் அட்டமஸ்தானாதிபதி மற்றும் ஜனாதிபதியின் பிரதான அதிகாரி பிரபாத் சந்திரகீர்த்தி ஆகியோரின் இணைத் தலைமையில் நடைபெற்ற ஜனாதிபதி ஆலோசனைக் குழுக் கூட்டத்தைத் தொடர்ந்து இந்த அறிவிப்புகள் வெளியாகியுள்ளன.