பேராதனை - கம்பளை இடையிலான புகையிரத சேவை ஒக்டோபர் 2 ஆம் திகதி முதல் மீண்டும் ஆரம்பம்
டித்வா சூறாவளி காரணமாகப் கடுமையாகப் பாதிக்கப்பட்டிருந்த பிரதான புகையிரதப் பாதையின் பேராதனை மற்றும் கம்பளை இடையிலான புகையிரதச் சேவைகள், சீரமைப்புப் பணிகளுக்குப் பின்னர் எதிர்வரும் ஒக்டோபர் மாதம் 2 ஆம் திகதி முதல் மீண்டும் ஆரம்பிக்கப்படவுள்ளதாகப் புகையிரதத் திணைக்களம் அறிவித்துள்ளது.
ரம்புக்கனை மற்றும் கம்பளைக்கு இடையிலான புகையிரதப் பாதையில் 103 இடங்களில் கடுமையான சேதங்கள் ஏற்பட்டிருந்தன. இதில் 36 இடங்களில் பாரிய நிலச்சரிவுகளும், 67 இடங்களில் மண்சரிவுகளும் பதிவாகியிருந்ததாக இலங்கை புகையிரதச் சேவைகள் திணைக்களம் தெரிவித்துள்ளது.
தேசிய கட்டிட ஆராய்ச்சி நிறுவனத்தின் (NBRO) ஒத்துழைப்புடன், புகையிரதத் திணைக்களத்தின் பாதை மற்றும் பராமரிப்புத் துணைப் பிரிவினர் இந்தச் சீரமைப்புப் பணிகளை முன்னெடுத்திருந்தனர். ரம்புக்கனை - கதுகன்னாவை இடையிலான செங்குத்தான பாதை அமைப்பு, மாற்று வீதி வசதிகள் இல்லாமை, சீரற்ற காலநிலை மற்றும் கனரக இயந்திரங்கள் மற்றும் மூலப்பொருட்களைப் புகையிரதங்கள் மூலமே கொண்டு செல்ல வேண்டியிருந்தமை போன்ற பல்வேறு சவால்களுக்கு மத்தியிலேயே இச்சீரமைப்புப் பணிகள் வெற்றிகரமாகப் பூர்த்தி செய்யப்பட்டுள்ளன.
இதற்கமைய, எதிர்வரும் ஒக்டோபர் 2 ஆம் திகதி பிற்பகல் முதல் கொழும்பு கோட்டை - பேராதனை / கம்பளை இடையிலான வழக்கமான புகையிரதச் சேவைகள் திருத்தப்பட்ட நேர அட்டவணையின் கீழ் மீண்டும் ஆரம்பமாகவுள்ளன.
