தியாக தீபத்தின் சிலை அகற்றம்: வடகிழக்கின் 8 மாவட்டங்களிலும் ஒரே நேரத்தில் கவனயீர்ப்பு போராட்டம்!
தியாக தீபம் திலீபனின் சிலை அகற்றப்பட்டமைக்குக் கடும் எதிர்ப்புத் தெரிவித்து, வலிந்து காணாமல் ஆக்கப்பட்டோரின் உறவுகள் சங்கத்தின் ஏற்பாட்டில் யாழ்ப்பாணம் நல்லூரில் பிரம்மாண்ட கவனயீர்ப்புப் போராட்டமொன்று முன்னெடுக்கப்பட்டது.
நல்லூரில் அமைந்துள்ள தியாக தீபம் திலீபனின் பிரதான நினைவுத் தூபி வளாகத்தில் நடைபெற்ற இப்போராட்டத்தில், காணாமல் ஆக்கப்பட்டோரின் உறவினர்கள், பொது அமைப்புகளின் பிரதிநிதிகள், அரசியல் கட்சிகளின் பிரதிநிதிகள் மற்றும் பொதுமக்கள் எனப் பெருந்திரளானோர் கலந்துகொண்டனர்.
அகற்றப்பட்ட சிலை மீண்டும் அதே இடத்தில் மீளப் பிரதிஷ்டை செய்யப்படும் வரை தமது போராட்டங்கள் ஓயாது என்றும், பல்வேறு வடிவங்களில் தொடர்ச்சியாக முன்னெடுக்கப்படும் என்றும் போராட்டத்தில் ஈடுபட்டவர்கள் உறுதியாக வலியுறுத்தினர்.
இதேவேளை, நல்லூரில் நடைபெற்ற பிரதான போராட்டத்திற்கு ஆதரவு தெரிவிக்கும் வகையிலும், சிலை அகற்றப்பட்ட சம்பவத்தைக் கண்டித்தும் வடக்கு மற்றும் கிழக்கு மாகாணங்களிலுள்ள எட்டு மாவட்டங்களிலும் ஒரே நேரத்தில் இக்கவனயீர்ப்புப் போராட்டங்கள் ஒருங்கிணைக்கப்பட்டு நடத்தப்பட்டமை குறிப்பிடத்தக்கது.
