மல்வத்தையில் இரு பிள்ளைகளின் தாய் தூக்கில் தொங்கி மரணம்
அம்பாறை மாவட்டம் சம்மாந்துறை பொலிஸ் பிரிவிற்குட்பட்ட கணபதிபுரம் – மல்வத்தை 04 ஆம் பகுதியில் இரு பிள்ளைகளின் தாயாரான பெண் ஒருவர் தூக்கிட்டு உயிரிழந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
இச்சம்பவத்தில் அதே பகுதியைச் சேர்ந்த வேலுப்பிள்ளை பிரவாவதி (வயது 54) என்பவரே இவ்வாறு சடலமாக மீட்கப்பட்டவராவார்.
சம்பவம் குறித்துத் தகவலறிந்த சம்மாந்துறை நீதிமன்ற பதில் நீதிபதி ஏ.எம். நசீல் அவர்களின் உத்தரவுக்கு அமைய, திடீர் மரண விசாரணை அதிகாரி அப்துல் ஹமீத் அல் ஜவாஹிர் சம்பவ இடத்திற்கு நேரடியாகச் சென்று முதற்கட்ட விசாரணைகளையும், சடலப் பார்வையிடுதலையும் முன்னெடுத்தார்.
இதனைத் தொடர்ந்து, உயிரிழந்தவரின் சடலம் உடற்கூறாய்வுப் பரிசோதனைகளுக்காக சம்மாந்துறை ஆதார வைத்தியசாலைக்கு அனுப்பி வைக்கப்பட்டுள்ளது.
இப்பெண்ணின் மரணத்திற்கான காரணம் இதுவரையில் துல்லியமாக தெரியவரவில்லை. இது தற்கொலையா அல்லது வேறு ஏதேனும் பின்னணிகள் உள்ளதா என்ற கோணத்தில் சம்மாந்துறை பொலிஸார் மேலதிக விசாரணைகளைத் தீவிரமாக மேற்கொண்டு வருகின்றனர்.
