நீதிமன்ற டிஜிட்டல்மயமாக்கல் திட்டம் குறித்து பிரேசில் தூதுவரிடம் நீதி அமைச்சர் தெளிவுரை!
இலங்கைக்கும் பிரேசிலுக்கும் இடையிலான இருதரப்பு வர்த்தகம், நீதித்துறை டிஜிட்டல்மயமாக்கல் மற்றும் சட்ட ஒத்துழைப்பு ஆகியவற்றை மேலும் வலுப்படுத்துவதற்கு இருநாடுகளும் மீள உறுதிபூண்டுள்ளன.
நீதி மற்றும் தேசிய ஒருமைப்பாட்டு அமைச்சில் இன்று (28) உயர்மட்ட சந்திப்பொன்று இடம்பெற்றது. நீதி மற்றும் தேசிய ஒருமைப்பாட்டு அமைச்சர், சட்டத்தரணி ஹர்ஷண நாணயக்கார மற்றும் பிரேசில் கூட்டாட்சிக் குடியரசிற்காக புதிதாக நியமிக்கப்பட்ட இலங்கைக்கான தூதுவர் ஜோர்ஜ் ஜெரால்டோ கத்ரி ஆகியோருக்கு இடையில் இக்கலந்துரையாடல் நடைபெற்றது.
இச்சந்திப்பின் போது, இரு நாடுகளுக்கும் இடையிலான நீண்டகால நட்புறவை மேலும் வலுப்படுத்துதல், வர்த்தக மற்றும் ஏற்றுமதி நடவடிக்கைகளை ஊக்குவித்தல், நல்லாட்சியை மேம்படுத்துதல் மற்றும் பொதுவான சவால்களுக்கு இருதரப்பு தீர்வுகளைக் காண்பது குறித்தும் தூதுவர் கத்ரி சுட்டிக்காட்டினார்.
பாரம்பரிய வழக்குக் கோப்பு முறையிலிருந்து விடுபட்டு, நவீன மற்றும் திறமையான நீதித்துறை அமைப்பை உருவாக்கும் நோக்கில் இலங்கை முழுவதும் முன்னெடுக்கப்பட்டு வரும் நீதிமன்ற டிஜிட்டல்மயமாக்கல் திட்டம் குறித்து அமைச்சர் நாணயக்கார இதன்போது தூதுவருக்குத் தெளிவுபடுத்தினார். அத்துடன், நாட்டில் தற்போது மேற்கொள்ளப்பட்டு வரும் சட்ட மறுசீரமைப்புகள் குறித்தும் அவர் விளக்கமளித்தார்.
