தமிழக மீனவர் படகுகள் அழிப்பு: மத்திய அரசுக்கு மீனவர் காங்கிரஸ் கண்டனம்!
தமிழக மீனவர்களின் படகுகளை இலங்கை கடற்படை அழித்து வருவது மனிதாபிமானமற்ற செயல் என்றும், இதனை மத்திய பிரதமர் நரேந்திர மோடி தலைமையிலான அரசு வேடிக்கை பார்ப்பது கடும் கண்டனத்திற்குரியது என்றும் அகில இந்திய மீனவர் காங்கிரஸின் தேசிய தலைவர் ஆம்ஸ்ட்ராங் பெர்னாண்டோ தெரிவித்துள்ளார்.
இது குறித்து பாம்பனைச் சேர்ந்த அவர் வெளியிட்டுள்ள அறிக்கையில் குறிப்பிடப்பட்டுள்ளதாவது:
தமிழக மீனவர்களுக்குச் சொந்தமான படகுகளைச் சட்டவிரோதமாகக் கைப்பற்றியுள்ள இலங்கை கடற்படை, அவற்றை உடைத்து அழித்து வருவதாக வெளியாகும் செய்திகள் மிகுந்த வேதனையை அளிக்கின்றன. மீனவர்களின் பிரதான வாழ்வாதாரமாக விளங்கும் படகுகளை அழிப்பது, அவர்களின் பொருளாதாரத்தின் மீது தொடுக்கப்படும் நேரடித் தாக்குதலாகும்.
இலங்கை அரசு தமிழக மீனவர்களின் வாழ்வாதாரத்தை சீரழித்து வரும் நிலையில், மத்திய அரசு தொடர்ந்து மௌனம் சாதித்து வருகிறது. மீனவர்களுக்கு அநீதி இழைக்கப்படும் போதெல்லாம் உரிய தீர்வு காணாமல் மத்திய அரசு வேடிக்கை பார்ப்பது ஏமாற்றமளிக்கிறது.
எனவே, இலங்கை அரசின் இந்த அத்துமீறலை மத்திய அரசு உடனடியாகக் கண்டிக்க வேண்டும். கைப்பற்றப்பட்ட படகுகள் எவையும் அழிக்கப்படாமல் தடுப்பதுடன், இலங்கை வசமுள்ள அனைத்துப் படகுகளையும் சேதமின்றி மீட்டு உரிமையாளர்களிடம் ஒப்படைக்க நடவடிக்கை எடுக்க வேண்டும்.
மேலும், இதுவரை அழிக்கப்பட்ட படகுகளுக்கும், அதனால் பாதிக்கப்பட்ட மீனவக் குடும்பங்களுக்கும் உரிய இழப்பீட்டுத் தொகையை மத்திய அரசு உடனடியாக வழங்கிட முன்வர வேண்டும் என்றும் அவர் வலியுறுத்தியுள்ளார்.
