சூரிய சக்தி மின் உற்பத்தித் துறையை அரசாங்கம் சீரழிக்கின்றது:சஜித் பிரேமதாச குற்றச்சாட்டு!

இலங்கையின் சூரிய சக்தி மின் உற்பத்தித் துறையை அரசாங்கம் தனது புதிய கொள்கை மாற்றங்கள் ஊடாகச் சீரழித்து வருவதாகவும், எரிபொருள் மற்றும் அனல்மின் உற்பத்தித் துறையினருக்கு சாதகமாகச் செயற்படுவதாகவும் எதிர்க்கட்சித் தலைவர் சஜித் பிரேமதாச கடுமையாகக் குற்றம் சாட்டியுள்ளார்.

இலங்கை பயன்பாடுகள் ஆணைக்குழுவிற்கு (PUCSL) விஜயம் மேற்கொண்ட எதிர்க்கட்சித் தலைவர், ஆணைக்குழுவின் தலைவர் பேராசிரியர் கே. பி. எல். சந்திரலால் உள்ளிட்ட மூத்த அதிகாரிகளைச் சந்தித்துக் கலந்துரையாடினார். இதன் போதே அவர் மேற்கண்ட கருத்துக்களை வெளியிட்டார்.

நிகரக் கணிப்பீடு மற்றும் நிகரக் கணக்கீட்டு முறைமைகளை நிறுத்தி, புதிய ஒப்பந்தங்களை 'நிகரக் கூட்டல்' (Net Plus) திட்டத்திற்கு மாற்ற அரசாங்கம் தீர்மானித்துள்ளது. அரசாங்கம் மேலெழுந்தவாரியாக மறுசீரமைக்கத்தக்க ஆற்றல் பற்றிப் பேசினாலும், நடைமுறையில் 'எரிபொருள் மற்றும் அனல்மின் நிலைய மாஃபியாக்களை' பலப்படுத்துவதற்கே இந்நடவடிக்கை வழிவகுத்துள்ளதாகச் சஜித் பிரேமதாச சுட்டிக்காட்டினார்.

சூரிய சக்தி மின் திட்டங்களுக்கான அனுமதிகள் தன்னிச்சையாக இடைநிறுத்தப்பட்டுள்ளதாகக் குறிப்பிட்ட அவர், நாட்டில் 2,500 மெகாவாட் (MW) சூரிய சக்தியை உற்பத்திய செய்வதன் மூலம் நாட்டிற்கு சுமார் 25 பில்லியன் ரூபாயைச் சேமிக்க முடியும் என்றும் வலியுறுத்தினார்.

கட்டணக் குறைப்பும் முதலீட்டாளர் பாதிப்பும்

சூரிய சக்தி மின் கொள்முதல் கட்டணங்கள் குறைக்கப்பட்டமையையும் அவர் கடுமையாக விமர்சித்தார். 500 கிலோவாட் (kW) வரையிலான கூரை வழி சூரிய சக்தி அமைப்புகளுக்கு அலகு ஒன்றிற்கு 37 ரூபாயாக இருந்த கட்டணம், 2024 ஜூலை முதல் 27.06 ரூபாயாகக் குறைக்கப்பட்டது. இத்தகைய கட்டணக் குறைப்புகளும் கொள்கை மாற்றங்களும் இத்துறையில் புதிய முதலீடுகளைப் பாதிப்பதுடன், இளம் தொழில்முனைவோரையும் தொழில்வல்லுநர்களையும் பெருமளவில் பாதிக்கும் என அவர் தெரிவித்தார்.

மேலும், யுகதனவி , சோபாதனவி மற்றும் சகஸ்தனவி ஆகிய மின்நிலையங்களைக் சுட்டிக்காட்டிய எதிர்க்கட்சித் தலைவர், திரவமாக்கப்பட்ட இயற்கை எரிவாயு (LNG) கிடைக்காமையால் டீசலை நம்பியிருக்க வேண்டிய சூழல் ஏற்பட்டுள்ளதாகவும், இது எரிபொருள் சார்ந்த மின் உற்பத்தியை மேலும் ஊக்குவிப்பதாகவும் சாடினார்.

நுகர்வோருக்குச் குறைந்த விலையில் தூய்மையான பசுமை ஆற்றல் கிடைக்க நடவடிக்கை எடுக்கப்பட வேண்டும் எனக் கோரிய அவர், இடைநிறுத்தப்பட்டுள்ள சூரிய சக்தி திட்டங்களுக்கான அனுமதிகளை உடனடியாக வழங்க வலியுறுத்தினார். அத்துடன், சூரிய சக்தித் துறையைப் பாதிக்கும் இத்தகைய நடவடிக்கைகளுக்கு எதிராக உள்நாட்டிலும் சர்வதேச மட்டத்திலும் சட்ட மற்றும் அரசியல் ரீதியான நடவடிக்கைகள் முன்னெடுக்கப்படும் என்றும் அவர் எச்சரித்தார்.