6 நிறுவனங்கள் மற்றும் அவற்றின் இயக்குநர்களின் சொத்துக்களை முடக்கியது மத்திய வங்கி

இலங்கை மத்திய வங்கி (CBSL), சட்டவிரோத நிதிச் செயற்பாடுகளில் ஈடுபட்டதாகச் சந்தேகிக்கப்படும் 6 நிறுவனங்கள் மற்றும் அவற்றின் இயக்குநர்களின் சொத்துக்களை முடக்குவதற்கான இடைக்காலக் கட்டளையை பிறப்பித்துள்ளது.

இதன்படி, குறித்த நிறுவனங்கள் மற்றும் அவற்றின் இயக்குநர்கள் தமக்குச் சொந்தமான அசையும், அசையாச் சொத்துக்களை விற்கவோ, வேறு நபர்களுக்குப் மாற்றவோ அல்லது எந்தவொரு வழியிலும் பரிமாற்றம் செய்யவோ முடியாது எனத் தடை விதிக்கப்பட்டுள்ளது.

நேற்று (செப்டம்பர் 22) இலங்கை மத்திய வங்கியினால் வெளியிடப்பட்டுள்ள உத்தியோகபூர்வ அறிக்கையிலேயே இத்தகவல் தெரிவிக்கப்பட்டுள்ளது.

கொழும்பு மேல் நீதிமன்றம் உறுதி செய்தது

2011 ஆம் ஆண்டின் 42 ஆம் இலக்க நிதி வியாபாரச் சட்டத்தின் 44 ஆம் பிரிவின் கீழ் இலங்கை மத்திய வங்கியினால் இக்கட்டளை பிறப்பிக்கப்பட்டுள்ளதுடன், பின்னர் கொழும்பு மேல் நீதிமன்றத்தினால் இத்தடை உத்தரவு உறுதிசெய்யப்பட்டு நீடிக்கப்பட்டுள்ளது.

இவ்வாறு சொத்துக்கள் முடக்கப்பட்டுள்ள 6 நிறுவனங்களின் விவரம்:

கசாகல கிரீன் பிளான்டேஷன் (தனியார்) நிறுவனம் [Kasagala Green Plantation (Private) Limited]

சிலோன் கிரீன் லைஃப் பிளான்டேஷன் (தனியார்) நிறுவனம் [Ceylon Green Life Plantation (Private) Limited]

சிங்க கெபிடல் இன்வெஸ்ட்மண்ட் நிறுவனம் [Singhe Capital Investment Limited]

புரோ ஷொப் எட்வர்டைசிங் ஹோல்டிங்ஸ் (தனியார்) நிறுவனம் [Pro Shop Advertising Holdings (Private) Limited]

ஏதென்ஸ் இன்டர்நெஷனல் எஜுகேஷன் சென்டர் (தனியார்) நிறுவனம் [Athens International Education Centre (Private) Limited]

இயொன் லங்கா இன்வெஸ்ட்மண்ட் அண்ட் ஃபிலிம் புரொடக்ஷன் இன்டர்நெஷனல் (தனியார்) நிறுவனம் [Eyon Lanka Investment & Film Production International Company (Private) Limited]

சட்டவிரோத நிதி நடவடிக்கைகள்

இவற்றுள், 'சிங்க கெபிடல் இன்வெஸ்ட்மண்ட்', 'புரோ ஷொப் எட்வர்டைசிங்', 'ஏதென்ஸ் இன்டர்நெஷனல் எஜுகேஷன் சென்டர்' மற்றும் 'இயொன் லங்கா இன்வெஸ்ட்மண்ட்' ஆகிய 4 நிறுவனங்களும் நிதி வியாபாரச் சட்டத்தின் 2 ஆம் பிரிவை மீறி, அனுமதியின்றி நிதி வியாபாரத்தில் ஈடுபட்டமை மற்றும் வைப்புகளைப் (Deposits) பெற்றுக்கொண்டமை உறுதி செய்யப்பட்டுள்ளதாக மத்திய வங்கி சுட்டிக்காட்டியுள்ளது.

அதேவேளை, 'கசாகல கிரீன் பிளான்டேஷன்' மற்றும் 'சிலோன் கிரீன் லைஃப் பிளான்டேஷன்' ஆகிய இரு நிறுவனங்களும் நிதி வியாபாரச் சட்டத்தின் 42 ஆம் பிரிவின் கீழ், சட்டவிரோதமாக வைப்புகளைப் பெற்றுள்ளனவா என்பது குறித்துத் தற்போது தீவிர விசாரணைகள் முன்னெடுக்கப்பட்டு வருகின்றன.

பொதுமக்களுக்கு மத்திய வங்கி எச்சரிக்கை

சட்டப்பூர்வமாக அனுமதி அளிக்கப்பட்ட நிறுவனங்களில் மட்டுமே பணத்தை வைப்புச் செய்யுமாறு மத்திய வங்கி பொதுமக்களைக் கேட்டுக்கொண்டுள்ளது. வங்கித் தொழில் சட்டம் (Banking Act) அல்லது நிதி வியாபாரச் சட்டத்தின் கீழ் உரிமம் பெற்ற நிறுவனங்கள் அல்லது அச்சட்டங்களிலிருந்து விலக்களிக்கப்பட்ட நிறுவனங்களுக்கு மட்டுமே பொதுமக்களிடமிருந்து வைப்புகளைப் பெற சட்டப்பூர்வ உரிமை உண்டு எனத் தெளிவுபடுத்தப்பட்டுள்ளது.

மேலும், சட்டவிரோத நிதி நிறுவனங்கள் மற்றும் தனிநபர்கள் குறித்துப் பெறப்பட்ட முறைப்பாடுகளின் அடிப்படையில் மேலும் பல நிறுவனங்கள் தொடர்பாக விசாரணைகள் முன்னெடுக்கப்பட்டு வருவதாகவும் இலங்கை மத்திய வங்கி அறிவித்துள்ளது.