மின்தொடர் திட்டத்திற்கு அதிக மின்சாரம் தேவை: அமைச்சர் பிமல் ரத்நாயக்க

மின்சார இரயில்வே திட்டத்தை நடைமுறைப்படுத்துவதற்கு அதிகளவிலான மின்சாரம் தேவைப்படும் என போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க பாராளுமன்றத்தில் இன்று (22) தெரிவித்தார்.

இத்திட்டம் நாட்டின் எதிர்கால மிகப்பெரிய மின்சார நுகர்வோர்களில் ஒன்றாக மாறக்கூடும் என்றும் அவர் சுட்டிக்காட்டினார்.

முன்மொழியப்பட்டுள்ள மின்சார இரயில்வே திட்டத்திற்குத் தேவையான மின்சாரத்தின் அளவு மிக அதிகமாக இருக்கும் என்பதனால், அதற்கான சக்திப் தேவைகளை நிவர்த்தி செய்வது தொடர்பில் மின்சக்தி அமைச்சுடன் விரிவான பேச்சுவார்த்தைகள் முன்னெடுக்கப்பட்டு வருவதாக அமைச்சர் குறிப்பிட்டார்.

நாட்டின் எதிர்கால சக்திப் தேவைகளை அதிகளவில் பயன்படுத்தக்கூடிய முதன்மைத் திட்டங்களில் ஒன்றாகவே இந்த மின்சார இரயில்வே திட்டம் பரிசீலிக்கப்பட்டு வருகிறது.

இதேவேளை, நாட்டில் அதிகரிக்கப்பட்டு வரும் மின்சார உற்பத்தியைப் பயன்படுத்தக்கூடிய வகையில் புதிய தொழிற்சாலைகள் மற்றும் திட்டங்களை இலங்கை உருவாக்க வேண்டியதன் அவசியத்தையும் அமைச்சர் வலியுறுத்தினார். அவ்வாறு இல்லையெனில், உபரியாக (மிகை) இருக்கும் மின்சாரத்தை வெளிநாடுகளுக்கு ஏற்றுமதி செய்ய வேண்டிய நிலை ஏற்படும் என்றும் அவர் தெரிவித்தார்.

மின்சார இரயில்வே திட்டம் போன்ற பாரிய அளவிலான திட்டங்களுக்குத் தேவையான மின்சாரத்தைப் பெற்றுக் கொள்வதற்காக, புதுப்பிக்கத்தக்க சக்தி மூலங்களைப் பயன்படுத்துவது குறித்து அரசாங்கம் அவதானம் செலுத்தி வருவதாகவும் அமைச்சர் மேலும் தெரிவித்தார்.