‘எனது வாகனம், எனது எரிபொருள்’ என பொது வீதியில் கூற முடியாது: அமைச்சர் பிமல் ரத்நாயக்க எச்சரிக்கை!

சொந்த வாகனம் மற்றும் எரிபொருளைப் பயன்படுத்துவதாகக் கூறி, வீதிப் பாதுகாப்பு விதிகளை எவரும் மீற முடியாது எனப் போக்குவரத்து அமைச்சர் பிமல் ரத்நாயக்க எச்சரித்துள்ளார். பொது வீதிகளைப் பயன்படுத்தும் அனைத்து சாரதிகளும் சட்டத்திற்கு உட்பட்டே செயற்பட வேண்டும் என்றும் அவர் வலியுறுத்தினார்.

நிகழ்வொன்றில் கலந்துகொண்டு உரையாற்றிய அமைச்சர், ஒருவர் தனது சொந்தக் காணிக்குள் வாகனங்கள் தொடர்பில் எத்தகைய தீர்மானங்களையும் எடுக்க சுதந்திரம் உள்ளது எனவும், ஆனால் பிறரின் பாதுகாப்பை உறுதி செய்ய வேண்டிய பொது வீதிகளில் அத்தகைய சுதந்திரத்தைப் பயன்படுத்த முடியாது எனவும் சுட்டிக்காட்டினார்.

"எனது வாகனம், எனது எரிபொருள் என்று நீங்கள் உங்களது சொந்த வளவுக்குள் கூறிக் கொள்ளலாம். ஆனால், அந்த மனப்போக்கை பொது வீதிகளுக்குக் கொண்டு வர முடியாது. வீதிச் சட்டம் அனைவருக்கும் பொதுவானது" என அமைச்சர் பிமல் ரத்நாயக்க தெரிவித்தார்.

வீதி விபத்துக்கள் இடம்பெறும்போது, அதில் நேரடியாகப் பாதிக்கப்படுபவர்கள் மட்டுமன்றி, மருத்துவப் பணியாளர்கள், பொலிஸ் அதிகாரிகள் மற்றும் பிற அரசு ஊழியர்கள் எனப் பலரும் அவசரப் பணிகளில் ஈடுபட வேண்டிய நிலை ஏற்படுவதாகவும் அவர் விளக்கமளித்தார்.

மேலும், வீதி விபத்துக்களை தனிப்பட்ட சம்பவங்களாகப் பார்க்காமல், அவற்றுக்கான அடிப்படைக் காரணங்களைக் கண்டறிய ஆய்வு செய்வதன் அவசியத்தையும் அமைச்சர் சுட்டிக்காட்டினார்.

உயிரிழப்புகளை ஏற்படுத்தும் வீதி விபத்துகளுக்கான காரணங்களைச் சரியாகப் புரிந்து கொள்வதற்காக, தாம் தனிப்பட்ட முறையில் விபத்து அறிக்கைகளைப் படித்ததாகவும், பொலிஸ் அதிகாரிகள், மருத்துவ நிபுணர்கள் மற்றும் மோட்டார் வாகனப் பரிசோதகர்களின் கண்டுபிடிப்புகளை ஆராய்ந்ததாகவும் அவர் கூறினார்.

பல உயிர்களைப் பலிகொண்ட பிரதான பேருந்து விபத்துக்கள் குறித்து மேற்கொள்ளப்பட்ட விசாரணைகளில், அந்த வாகனங்களில் காணப்பட்ட கடுமையான இயந்திரக் கோளாறுகளே விபத்துக்களுக்கு முக்கியக் காரணம் என்பது கண்டறியப்பட்டுள்ளதாக அமைச்சர் தெரிவித்தார்.

இதனைக் கருத்திற் கொண்டு, பயணிகள் போக்குவரத்து வாகனங்களுக்காகக் கூடுதல் தகுதிச் சான்றிதழ் நடைமுறைகளை அறிமுகப்படுத்த அரசாங்கம் நடவடிக்கை எடுத்துள்ளதாக அவர் கூறினார்.

அமைச்சர் வெளியிட்ட புதிய விதிமுறைகளின்படி, சுற்றுலா மற்றும் தீர்த்த யாத்திரைகளுக்குப் பயன்படுத்தப்படும் வாகனங்கள் உட்பட 5,000 கிலோமீட்டருக்கு மேல் பயணிக்கும் பயணிகள் போக்குவரத்து வாகனங்கள், குறிப்பிட்ட கால இடைவெளியில் இயந்திரத் தகுதிப் பரிசோதனைக்கு உட்படுத்தப்பட்டு சான்றிதழ் பெறப்பட வேண்டும்.

பயணிகள் போக்குவரத்திற்குப் பயன்படுத்தப்படும் வாகனங்கள் இயந்திரவியல் ரீதியாகத் தகுதியுடன் இருப்பதை உறுதி செய்வதற்காக, மூன்று மாதங்களுக்கு ஒருமுறை இந்தத் தகுதிப் பரிசோதனைகள் கட்டாயமாக்கப்படும் என அவர் குறிப்பிட்டார்.

அத்துடன், தகுதிவாய்ந்த சான்றளிக்கப்பட்ட பணிமனைகளை இந்தச் சான்றிதழ் வழங்கும் நடைமுறையில் இணைத்துக் கொள்ளத் திட்டமிட்டுள்ளதாகவும், இதன் மூலம் தகுதியான தொழில்நுட்ப வல்லுநர்களுக்கு வாய்ப்புகள் உருவாகுவதோடு வாகனப் பாதுகாப்புத் தரமும் வலுவடையும் என்றும் அமைச்சர் தெரிவித்தார்.

பொலிஸ் அதிகாரிகள் இந்தச் சான்றிதழ்களைப் பரிசோதிக்க முடியும் என்றும், விதிமுறைகளை மீறுபவர்களுக்கு எதிராக சட்ட நடவடிக்கை எடுக்கப்படும் என்றும் அவர் எச்சரித்தார்.

மேலும், இலங்கைக்கு இறக்குமதி செய்யப்படும் பேருந்துகளுக்கான புதிய தரநிலைகளுக்கு அமைச்சரவை ஒப்புதல் அளித்துள்ளதாகவும் அமைச்சர் வெளிப்படுத்தினார்.

தற்போது நாட்டில் இயங்கும் பல பேருந்துகள், பயணிகள் போக்குவரத்திற்காக எதிர்பார்க்கப்படும் பாதுகாப்புத் தரநிலைகளைப் பூர்த்தி செய்யவில்லை எனச் சுட்டிக்காட்டிய அவர், புதிய விதிமுறைகளின் மூலம் எதிர்காலத்தில் அங்கீகரிக்கப்பட்ட பயணிகள் பாதுகாப்புத் தேவைகளைப் பூர்த்தி செய்யும் பேருந்துகள் மட்டுமே இறக்குமதி செய்யப்படுவதை உறுதி செய்ய முடியும் என்றார்.

சரக்கு போக்குவரத்திற்காக வடிவமைக்கப்பட்ட வாகனங்களை, பயணிகள் பேருந்துகளாகப் பயன்படுத்துவதற்காக நாட்டிற்குள் இறக்குமதி செய்ய இனி அனுமதி வழங்கப்பட மாட்டாது என்றும் அவர் மேலும் தெரிவித்தார்.

வீதி விபத்துகளைக் கவனமாக ஆராய்ந்து, நடைமுறைச் சாத்தியமான பாதுகாப்பு மேம்பாடுகளை அறிமுகப்படுத்துமாறு சம்பந்தப்பட்ட அதிகாரிகளுக்கும் அமைப்புகளுக்கும் கோரிக்கை விடுத்த அமைச்சர், குறைந்த செலவிலான மாற்றங்கள் கூட எதிர்காலப் பேரிடர்களைத் தடுக்க உதவும் எனத் தெரிவித்தார்.