இலங்கைக்கு ஜி.எஸ்.பி பிளஸ் சலுகை ரத்து செய்யப்படவில்லை: பிரதி நிதி அமைச்சர்

ஐரோப்பிய ஒன்றியத்தால் இலங்கைக்கு வழங்கப்படும் ஜி.எஸ்.பி பிளஸ் (GSP+) சலுகை வர்த்தகத் திட்டம் இடைநிறுத்தப்பட்டுள்ளதாகக் கூறப்படும் செய்திகள் முற்றிலும் தவறானவை என்றும், தவறாக வழிநடத்தக்கூடியவை என்றும் பிரதி நிதி அமைச்சர் கலாநிதி அனில் ஜெயந்த பெர்னாண்டோ தெரிவித்துள்ளார்.

பாராளுமன்றத்தில் பாராளுமன்ற உறுப்பினர் ஹர்ஷன ராஜகருணா எழுப்பிய கேள்விக்கு பதிலளிக்கும் போதே பிரதி அமைச்சர் இதனைத் தெளிவுபடுத்தினார்.

தற்போது நடைமுறையிலுள்ள ஜி.எஸ்.பி பிளஸ் (GSP+) சலுகைக்கான கால அவகாசம் எதிர்வரும் 2028 ஆம் ஆண்டு டிசம்பர் 31 ஆம் திகதி வரை முழுமையாகச் செல்லுபடியாகும் என அவர் சுட்டிக்காட்டினார்.

புதுப்பிக்கப்பட்ட புதிய விதிகளின் கீழ், பூர்த்தி செய்யப்பட வேண்டிய சர்வதேச உடன்படிக்கைகளின் எண்ணிக்கை 27 இலிருந்து 32 ஆக உயர்த்தப்பட்டுள்ள போதிலும், இலங்கை தொடர்ந்தும் முன்னுரிமை சந்தைப் பிரவேசச் சலுகைகளை அனுபவித்து வருவதாக அவர் மேலும் கூறினார்.

ஜி.எஸ்.பி பிளஸ் (GSP+) திட்டத்தின் கீழ் கிடைக்கும் முன்னுரிமை சந்தைப் பிரவேச நிலைமைகளை ஆராய்வதற்காக அமைச்சரவையினால் விசேட குழுவொன்று நியமிக்கப்பட்டுள்ளதாகவும் பிரதி அமைச்சர் குறிப்பிட்டார்.

அத்துடன், 2028 ஆம் ஆண்டுக்குப் பின்னரும் இந்த வர்த்தகச் சலுகைத் திட்டத்தை எவ்வித தடையுமின்றி தொடர்ச்சியாகப் பெற்றுக்கொள்வதை உறுதிசெய்யும் பொருட்டு, புதிய விண்ணப்பத்தைத் தயாரிப்பதற்காக தனியான மற்றொரு குழு நியமிக்கப்பட்டுள்ளதாகவும் அவர் பாராளுமன்றத்தில் தெரிவித்தார்.