ஆஸ்திரேலிய அரச இணையதளத்தில் OpenAI ஊடுருவல்: பிரதமர் கண்டனம்

ஆஸ்திரேலிய அரசின் சுகாதாரத் துறை இணையதளத்தில், முன்னணி செயற்கை நுண்ணறிவு (AI) நிறுவனமான 'OpenAI' இன் தன்னாட்சி அமைப்பைக் கொண்ட 'ஏஜென்ட்' (Agent) ஊடுருவியுள்ள சம்பவம் பெரும் அதிர்ச்சியை ஏற்படுத்தியுள்ளது. கடந்த ஜூன் மாதம் இடம்பெற்ற இச்சம்பவம் முற்றிலும் “ஏற்றுக்கொள்ள முடியாத ஒன்று” என ஆஸ்திரேலியப் பிரதமர் அந்தோணி அல்பானீஸ் தெரிவித்துள்ளார்.

நியூயோர்க்கில் ஊடகவியலாளர்களைச் சந்தித்த பிரதமர் அல்பானீஸ், குறித்த 'OpenAI ஏஜென்ட்' ஆஸ்திரேலிய சுகாதாரப் புள்ளியியல் சேவையின் பொதுவான மற்றும் இரகசியக் கோப்புகளை அணுகியுள்ளதாகக் குறிப்பிட்டார்.

இச்சம்பவம் ஜூன் மாதத்தில் இடம்பெற்றிருந்த போதிலும், செப்டம்பர் 10 ஆம் திகதி வரையில் OpenAI நிறுவனம் இது தொடர்பில் ஆஸ்திரேலிய அரசுக்கு எந்தவொரு உத்தியோகபூர்வ தகவலையும் தெரிவிக்கவில்லை என்றும், இறுதியாக ஒரு பொதுவான மின்னஞ்சல் (Generic Email) முகவரிக்கு மட்டுமே அது குறித்த அறிவிப்பை அனுப்பியிருந்ததாகவும் அவர் சாடினார்.

இது தொடர்பாகத் தொடர்ந்து கருத்து வெளியிட்ட பிரதமர் அல்பானீஸ்:

“இச்சம்பவம் குறித்து ஆஸ்திரேலியாவின் கடுமையான கவலையைத் தெரிவிப்பதற்காக OpenAI நிறுவனத்தின் தலைமை நிர்வாக அதிகாரி (CEO) சேம் ஆல்ட்மேனுடன் (Sam Altman) நான் பேசினேன். அத்துடன், நடந்த சம்பவத்தை அரசாங்கத்திற்குத் தெரிவிக்க அந்த நிறுவனம் இவ்வளவு நீண்ட காலம் எடுத்துக்கொண்டது குறித்து எனது ஏமாற்றத்தையும் வெளிப்படுத்தினேன். செப்டம்பர் 10 ஆம் திகதி வரை எவ்வித அறிவிப்பும் வழங்கப்படவில்லை, வழங்கப்பட்ட அறிவிப்பும் ஒரு பொது மின்னஞ்சல் முகவரிக்கு அனுப்பப்பட்ட சாதாரண மின்னஞ்சலாகும்” எனக் குறிப்பிட்டார்.

ஆராய்ச்சிப் பயன்பாட்டுக்கான தரவுகளைச் சேகரிக்கும் முயற்சியில் ஈடுபட்டிருந்த குறித்த OpenAI செயலி, தடைசெய்யப்பட்ட சில தரவுகளை அணுக முயன்றதாகவும், அத்தரவுகளுக்கான அணுகல் தடுக்கப்பட்டபோது, அத்தடையை மீறிச் செல்வதற்கான மாற்று வழிகளை அது சுயமாகத் தேடியுள்ளதாகவும் பிரதமர் தெரிவித்தார்.

நபர்களின் தனிப்பட்ட தரவுகளுக்குப் பாதிப்பில்லை

தற்போதைய விசாரணைகளின் அடிப்படையில், குடிமக்களின் தனிப்பட்ட தரவுகள் எதுவும் திருடப்படவில்லை என நம்பப்படுவதாகவும், இருப்பினும் அரசின் பிற அமைப்புகள் எவையேனும் இதனால் பாதிக்கப்பட்டுள்ளவா என்பது குறித்து ஆஸ்திரேலிய சமிக்ஞைகள் இயக்ககம் தீவிர தடயவியல் விசாரணைகளை முன்னெடுத்து வருவதாகவும் அவர் மேலும் தெரிவித்தார்.

இச்சம்பவம் குறித்து விளக்கமளித்துள்ள சான் பிரான்சிஸ்கோவைச் சேர்ந்த OpenAI நிறுவனம், "ஆஸ்திரேலியா தொடர்பான கேள்விகளுக்குப் பதில்கள் மற்றும் கிடைக்கக்கூடிய புள்ளியியல் தரவுகளை எமது செயற்கை நுண்ணறிவு மாதிரி (Model) மதிப்பீடு செய்தபோது, எதிர்பாராதவிதமாகச் சில ஆஸ்திரேலிய அரச இணையதளங்கள் பாதிக்கப்பட்டுள்ளன. இந்த மதிப்பீட்டின் போது, எங்களது செயற்கை நுண்ணறிவு மாதிரிகள் நாம் திட்டமிடாத சில நடவடிக்கைகளைச் சுயமாக மேற்கொண்டுவிட்டன" என ஒப்புக்கொண்டுள்ளது.

உலக அளவில் அதிகரிக்கும் செயற்கை நுண்ணறிவு அபாயங்கள்

OpenAI மற்றும் அதன் போட்டியாளரான 'Anthropic' ஆகிய நிறுவனங்களின் செயற்கை நுண்ணறிவு மாதிரிகள் அண்மைக்காலமாகப் பல்வேறு கணினி ஊடுருவல்களில் (Hacking) ஈடுபட்டு வருவது சர்வதேச ரீதியில் பெரும் கவலையை ஏற்படுத்தியுள்ளது.

அண்மையில் 'OpenAI' நிறுவனத்தின் இரு செயற்கை நுண்ணறிவு மாதிரிகள், கட்டுப்படுத்தப்பட்ட சோதனைச் சூழலிலிருந்து தப்பித்து, 'Hugging Face' என்ற செயற்கை நுண்ணறிவு தளத்தின் உள் அமைப்புகளுக்குள் ஊடுருவியிருந்தன.

அதேபோன்று, 'Anthropic' நிறுவனத்தின் மாதிரிகளும் சோதனைகளின் போது தடையை மீறி, மூன்று நிறுவனங்களின் அமைப்புகளுக்குள் அனுமதி இன்றி நுழைந்திருந்தமை கண்டுபிடிக்கப்பட்டது.

கூகுள் (Google) நிறுவனத்தின் நுகர்வோர் செயற்கை நுண்ணறிவு மாதிரியான 'ஜெமினி' (Gemini), உள்நுழைவுத் தரவுகளைக் (Login Credentials) தோராயமாகக் கணித்து பல அமைப்புகளை ஊடுருவியிருந்ததாகக் கடந்த வாரம் கூகுள் தெரிவித்திருந்தமையும் குறிப்பிடத்தக்கது.

செயற்கை நுண்ணறிவுத் தொழில்நுட்பத்தினால் ஏற்படும் பாதுகாப்பு அச்சுறுத்தல்களை எதிர்கொள்ள உலகளாவிய ரீதியில் இணையப் பாதுகாப்பை பலப்படுத்த வேண்டும் என OpenAI, Anthropic உட்பட 100 க்கும் மேற்பட்ட சர்வதேச அமைப்புகள் திறந்தவெளி அறிக்கை ஒன்றினூடாகக் கோரிக்கை விடுத்துள்ள நிலையிலேயே இச்சம்பவம் வெளிச்சத்திற்கு வந்துள்ளது.