நியூயோர்க்கில் ஹுவாய் நிறுவனத்திற்கு எதிராக குற்றவியல் வழக்கு விசாரணை ஆரம்பம்

சீனாவின் முன்னணி தொழில்நுட்ப நிறுவனமான ஹுவாய் (Huawei Technologies) மீது, தொழில் நுட்பங்களைத் திருடியமை, அமெரிக்க வர்த்தக இரகசியங்களை சட்டவிரோதமாகப் பெற சதித்திட்டம் தீட்டியமை மற்றும் வங்கி மோசடி (Bank fraud) உள்ளிட்ட பல தீவிர குற்றச்சாட்டுகளின் கீழ் நியூயோர்க் நீதிமன்றத்தில் குற்றவியல் வழக்கு விசாரணை ஆரம்பமாகவுள்ளது.

இவ்வழக்கிற்கான ஜூரி உறுப்பினர்களைத் (Jury) தெரிவு செய்யும் நடவடிக்கைகள் செவ்வாய்க்கிழமை ஆரம்பமாகவுள்ள நிலையில், சர்வதேச ரீதியில் இது பெருமளவில் கவனத்தை ஈர்த்துள்ளது.

அமெரிக்க நீதிமன்றத்தில் தாக்கல் செய்யப்பட்டுள்ள குற்றப்பத்திரிகையின் படி, வர்த்தக இரகசியங்களைத் திருடியமை தவிர, அமெரிக்காவின் தடைகளையும் மீறி வடகொரியாவுடன் ஹுவாய் நிறுவனம் வியாபார நடவடிக்கைகளில் ஈடுபட்டதாகவும் குற்றம் சாட்டப்பட்டுள்ளது. மேலும், 2009 ஆம் ஆண்டு ஈரானில் இடம்பெற்ற அரசுக்கு எதிரான ஆர்ப்பாட்டங்களின் போது, ஆர்ப்பாட்டக்காரர்களைக் கண்காணிப்பதற்கு ஈரானிய அரசாங்கத்திற்குத் தேவையான அதிநவீன கண்காணிப்புச் சாதனங்களை நிறுவி உதவியதாகவும் குறிப்பிடப்பட்டுள்ளது.

எனினும், தன் மீதான அனைத்துக் குற்றச்சாட்டுகளையும் ஹுவாய் நிறுவனம் முற்றாக மறுத்துள்ளதுடன், அமெரிக்க பிராந்திய அதிகாரத்திற்கு அப்பால் சென்று தம்மீது சுமத்தப்பட்டுள்ள இந்தக் குற்றச்சாட்டுகள் ஆதாரமற்றவை எனத் தெரிவித்து வழக்கைத் தள்ளுபடி செய்யுமாறு மனுத் தாக்கல் செய்துள்ளது.

அமெரிக்கா மற்றும் அதன் நட்பு நாடுகளான கனடா, பிரிட்டன் போன்ற நாடுகள் தேசிய பாதுகாப்பு அச்சுறுத்தலைக் காரணம் காட்டி ஹுவாய் நிறுவனத்தின் உபகரணங்களுக்குத் தடை விதித்துள்ளன. இதன் காரணமாக, சர்வதேச அளவில் தனது சந்தைப் பங்கைப் தக்கவைத்துக் கொள்ளப் போராடி வரும் அந்நிறுவனம், தற்போது சொந்தமாகச் செயலிச் சில்லுகளை (Microprocessors/Chips) உற்பத்தி செய்யும் முயற்சியில் தீவிரமாக ஈடுபட்டு வருகின்றது.